রাম কর্ণামৃতম্ | Rama Karnamrutham In Bengali

Also Read This In:- English, Gujarati, Hindi, Kannada, Marathi, Malayalam, Odia, Punjabi, Sanskrit, Tamil, Telugu.

মংগলশ্লোকাঃ
মংগলং ভগবান্বিষ্ণুর্মংগলং মধুসূদনঃ ।
মংগলং পুংডরীকাক্ষো মংগলং গরুডধ্বজঃ ॥ 1

মংগলং কোসলেংদ্রায মহনীযগুণাব্ধযে ।
চক্রবর্তিতনূজায সার্বভৌমায মংগলম্ ॥ 2

বেদবেদাংতবেদ্যায মেঘশ্যামলমূর্তযে ।
পুংসাং মোহনরূপায পুণ্যশ্লোকায মংগলম্ ॥ 3

বিশ্বামিত্রাংতরংগায মিথিলানগরীপতেঃ ।
ভাগ্যানাং পরিপাকায ভব্যরূপায মংগলম্ ॥ 4

পিতৃভক্তায সততং ভ্রাতৃভিঃ সহ সীতযা ।
নংদিতাখিললোকায রামচংদ্রায মংগলম্ ॥ 5

ত্যক্তসাকেতবাসায চিত্রকূটবিহারিণে ।
সেব্যায সর্বযমিনাং ধীরোদাত্তায মংগলম্ ॥ 6

সৌমিত্রিণা চ জানক্যা চাপবাণাসিধারিণা ।
সংসেব্যায সদা ভক্ত্যা সানুজাযাস্তু মংগলম্ ॥ 7

দংডকারণ্যবাসায খংডিতামরশত্রবে ।
গৃধ্ররাজায ভক্তায মুক্তিদাযাস্তু মংগলম্ ॥ 8

সাদরং শবরীদত্তফলমূলাভিলাষিণে ।
সৌলভ্যপরিপূর্ণায সত্ত্বোদ্যুক্তায মংগলম্ ॥ 9

হনূমত্সমবেতায হরীশাভীষ্টদাযিনে ।
বালিপ্রমথনাযাস্তু মহাধীরায মংগলম্ ॥ 10

শ্রীমতে রঘুবীরায সেতুলংঘিতসিংধবে ।
জিতরাক্ষসরাজায রণধীরায মংগলম্ ॥ 11

আসাদ্য নগরীং দিব্যামভিষিক্তায সীতযা ।
রাজাধিরাজরাজায রামভদ্রায মংগলম্ ॥ 12

বিভীষণকৃতে প্রীত্যা বিশ্বাভীষ্টপ্রদাযিনে ।
জানকীপ্রাণনাথায সদা রামায মংগলম্ ॥ 13

—-

শ্রীরামং ত্রিজগদ্গুরুং সুরবরং সীতামনোনাযকং
শ্যামাংগং শশিকোটিপূর্ণবদনং চংচত্কলাকৌস্তুভম্ ।
সৌম্যং সত্যগুণোত্তমং সুসরযূতীরে বসংতং প্রভুং
ত্রাতারং সকলার্থসিদ্ধিসহিতং বংদে রঘূণাং পতিম্ ॥ 14

শ্রীরাঘবং দশরথাত্মজমপ্রমেযং
সীতাপতিং রঘুবরান্বযরত্নদীপম্ ।
আজানুবাহুমরবিংদদলাযতাক্ষং
রামং নিশাচরবিনাশকরং নমামি ॥ 15

শ্রীরামচংদ্র করুণাকর রাঘবেংদ্র
রাজেংদ্রচংদ্র রঘুবংশসমুদ্রচংদ্র ।
সুগ্রীবনেত্রযুগলোত্পল-পূর্ণচংদ্র
সীতামনঃকুমুদচংদ্র নমো নমস্তে ॥ 16

সীতামনোমানসরাজহংস
সংসারসংতাপহর ক্ষমাবন্ ।
শ্রীরাম দৈত্যাংতক শাংতরূপ
শ্রীতারকব্রহ্ম নমো নমস্তে ॥ 17

বিষ্ণো রাঘব বাসুদেব নৃহরে দেবৌঘচূডামণে ।
সংসারার্ণবকর্ণধারক হরে কৃষ্ণায তুভ্যং নমঃ ॥ 18

সুগ্রীবাদিসমস্তবানরবরৈস্সংসেব্যমানং সদা ।
বিশ্বামিত্রপরাশরাদিমুনিভিস্সংস্তূযমানং ভজে ॥ 19

রামং চংদনশীতলং ক্ষিতিসুতামোহাকরং শ্রীকরং
বৈদেহীনযনারবিংদমিহিরং সংপূর্ণচংদ্রাননম্ ।
রাজানং করুণাসমেতনযনং সীতামনোনংদনং
সীতাদর্পণচারুগংডললিতং বংদে সদা রাঘবম্ ॥ 20

জানাতি রাম তব নামরুচিং মহেশো
জানাতি গৌতমসতী চরণপ্রভাবম্ ।
জানাতি দোর্বলপরাক্রমমীশচাপো
জানাত্যমোঘপটুবাণগতিং পযোধিঃ ॥ 21

মাতা রামো মত্পিতা রামচংদ্রো
ভ্রাতা রামো মত্সখা রাঘবেশঃ ।
সর্বস্বং মে রামচংদ্রো দাযালু-
র্নান্যং দৈবং নৈব জানে ন জানে ॥ 22

বিমলকমলনেত্রং বিস্ফুরন্নীলগাত্রং
তপনকুলপবিত্রং দানবধ্বংতমিত্রম্ ।
ভুবনশুভচরিত্রং ভূমিপুত্রীকলত্রং
দশরথবরপুত্রং নৌমি রামাখ্যমিত্রম্ ॥ 23

মার্গে মার্গে শাখিনাং রত্নবেদী
বেদ্যাং বেদ্যাং কিন্নরীবৃংদগীতম্ ।
গীতে গীতে মংজুলালাপগোষ্ঠী
গোষ্ঠ্যাং গোষ্ঠ্যাং ত্বত্কথা রামচংদ্র ॥ 24

বৃক্ষে বৃক্ষে বীক্ষিতাঃ পক্ষিসংঘাঃ
সংঘে সংঘে মংজুলামোদবাক্যম্ ।
বাক্যে বাক্যে মংজুলালাপগোষ্ঠী
গোষ্ঠ্যাং গোষ্ঠ্যাং ত্বত্কথা রামচংদ্র ॥ 25

দুরিততিমিরচংদ্রো দুষ্টকংজাতচংদ্রঃ
সুরকুবলযচংদ্রস্সূর্যবংশাব্ধিচংদ্রঃ ।
স্বজননিবহচংদ্রশ্শত্রুরাজীবচংদ্রঃ
প্রণতকুমুদচংদ্রঃ পাতু মাং রামচংদ্রঃ ॥ 26

কল্যাণদং কৌশিকযজ্ঞপালং
কলানিধিং কাংচনশৈলধীরম্ ।
কংজাতনেত্রং করুণাসমুদ্রং
কাকুত্স্থরামং কলযামি চিত্তে ॥ 27

রাজীবাযতলোচনং রঘুবরং নীলোত্পলশ্যামলং
মংদারাংচিতমংডপে সুললিতে সৌবর্ণকে পুষ্পকে ।
আস্থানে নবরত্নরাজিখচিতে সিংহাসনে সংস্থিতং
সীতালক্ষ্মণলোকপালসহিতং বংদে মুনীংদ্রাস্পদম্ ॥ 28

ধ্যাযে রামং সুধাংশুং নতসকলভবারণ্যতাপপ্রহারম্ ।
শ্যামং শাংতং সুরেংদ্রং সুরমুনিবিনুতং কোটিসূর্যপ্রকাশম্ ।
সীতাসৌমিত্রিসেব্যং সুরনরসুগমং দিব্যসিংহাসনস্থম্ ।
সাযাহ্নে রামচংদ্রং স্মিতরুচিরমুখং সর্বদা মে প্রসন্নম্ ॥ 29

ইংদ্রনীলমণিসন্নিভদেহং
বংদনীযমসকৃন্মুনিবৃংদৈঃ ।
লংবমানতুলসীবনমালং
চিংতযামি সততং রঘুবীরম্ ॥ 30

সংপূর্ণচংদ্রবদনং সরসীরুহাক্ষং
মাণিক্যকুংডলধরং মুকুটাভিরামম্ ।
চাংপেযগৌরবসনং শরচাপহস্তং
শ্রীরামচংদ্রমনিশং মনসা স্মরামি ॥ 31

মাতুঃ পার্শ্বে চরংতং মণিমযশযনে মংজুভূষাংচিতাংগম্ ।
মংদং মংদং পিবংতং মুকুলিতনযনং স্তন্যমন্যস্তনাগ্রম্ ।
অংগুল্যাগ্রৈঃ স্পৃশংতং সুখপরবশযা সস্মিতালিংগিতাংগম্ ।
গাঢং গাঢং জনন্যা কলযতু হৃদযং মামকং রামবালম্ ॥ 32

রামাভিরামং নযনাভিরামং
বাচাভিরামং বদনাভিরামম্ ।
সর্বাভিরামং চ সদাভিরামং
বংদে সদা দাশরথিং চ রামম্ ॥ 33

রাশব্দোচ্চারমাত্রেণ মুখান্নির্যাতি পাতকাঃ ।
পুনঃ প্রবেশভীত্যা চ মকারস্তু কবাটবত্ ॥ 34

অনর্ঘমাণিক্যবিরাজমান-
শ্রীপাদুকালংকৃতশোভনাভ্যাম্ ।
অশেষবৃংদারকবংদিতাভ্যাং
নমো নমো রামপদাংবুজাভ্যাম্ ॥ 35

চলত্কনককুংডলোল্লসিতদিব্যগংডস্থলং
চরাচরজগন্মযং চরণপদ্মগংগাশ্রযম্ ।
চতুর্বিধফলপ্রদং চরমপীঠমধ্যস্থিতং
চিদংশমখিলাস্পদং দশরথাত্মজং চিংতযে ॥ 36

সনংদনমুনিপ্রিযং সকলবর্ণবেদাত্মকং
সমস্তনিগমাগমস্ফুরিততত্ত্বসিংহাসনম্ ।
সহস্রনযনাব্জজাদ্যমরবৃংদসংসেবিতং
সমষ্টিপুরবল্লভং দশরথাত্মজং চিংতযে ॥ 37

জাগ্রত্স্বপ্নসুষুপ্তি-কালবিলসত্তত্ত্বাত্মচিন্মাত্রকং
চৈতন্যাত্মকমাধিপাপরহিতং ভূম্যাদিতন্মাত্রকম্ ।
শাংভব্যাদিসমস্তযোগকুলকং সাংখ্যাদিতত্ত্বাত্পরং
শব্দাবাচ্যমহং নমামি সততং ব্যুত্পত্তিনাশাত্পরম্ ॥ 38

ইক্ষ্বাকুবংশার্ণবজাতরত্নং
সীতাংগনাযৌবনভাগ্যরত্নম্ ।
বৈকুংঠরত্নং মম ভাগ্যরত্নং
শ্রীরামরত্নং শিরসা নমামি ॥ 39

ইক্ষ্বাকুনংদনং সুগ্রীবপূজিতং
ত্রৈলোক্যরক্ষকং সত্যসংধং সদা ।
রাঘবং রঘুপতিং রাজীবলোচনং
রামচংদ্রং ভজে রাঘবেশং ভজে ॥ 40

ভক্তপ্রিযং ভক্তসমাধিগম্যং
চিংতাহরং চিংতিতকামধেনুম্ ।
সূর্যেংদুকোটিদ্যুতিভাস্বরং তং
রামং ভজে রাঘবরামচংদ্রম্ ॥ 41

শ্রীরামং জনকক্ষিতীশ্বরসুতাবক্ত্রাংবুজাহারিণং
শ্রীমদ্ভানুকুলাব্ধিকৌস্তুভমণিং শ্রীরত্নবক্ষস্স্থলম্ ।
শ্রীকংঠাদ্যমরৌঘরত্নমকুটালংকারপাদাংবুজং
শ্রীবত্সোজ্জ্বলমিংদ্রনীলসদৃশং শ্রীরামচংদ্রং ভজে ॥ 42

রামচংদ্র চরিতাকথামৃতং
লক্ষ্মণাগ্রজগুণানুকীর্তনম্ ।
রাঘবেশ তব পাদসেবনং
সংভবংতু মম জন্মজন্মনি ॥ 43

অজ্ঞানসংভব-ভবাংবুধিবাডবাগ্নি-
রব্যক্ততত্ত্বনিকরপ্রণবাধিরূঢঃ ।
সীতাসমেতমনুজেন হৃদংতরালে
প্রাণপ্রযাণসমযে মম সন্নিধত্তে ॥ 44

রামো মত্কুলদৈবতং সকরুণং রামং ভজে সাদরং
রামেণাখিলঘোরপাপনিহতী রামায তস্মৈ নমঃ ।
রামান্নাস্তি জগত্রযৈকসুলভো রামস্য দাসোঽস্ম্যহং
রামে প্রীতিরতীব মে কুলগুরো শ্রীরাম রক্ষস্ব মাম্ ॥ 45

বৈদেহীসহিতং সুরদ্রুমতলে হৈমে মহামংটপে ।
মধ্যেপুষ্পকমাসনে মণিমযে বীরাসনে সংস্থিতম্ ।
অগ্রে বাচযতি প্রভংজনসুতে তত্ত্বং মুনিভ্যঃ পরম্ ।
ব্যাখ্যাংতং ভরতাদিভিঃ পরিবৃতং রামং ভজে শ্যামলম্ ॥ 46

বামে ভূমিসুতা পুরস্তু হনুমান্পশ্চাত্সুমিত্রাসুত-
শ্শত্রুঘ্নো ভরতশ্চ পার্শ্বদলযোর্বায্বাদিকোণেষ্বপি ।
সুগ্রীবশ্চ বিভীষণশ্চ যুবরাট্ তারাসুতো জাংববান্
মধ্যে নীলসরোজকোমলরুচিং রামং ভজে শ্যামলম্ ॥ 47

কেযূরাংগদকংকণৈর্মণিগণৈর্বৈরোচমানং সদা
রাকাপর্বণিচংদ্রকোটিসদৃশং ছত্রেণ বৈরাজিতম্ ।
হেমস্তংভসহস্রষোডশযুতে মধ্যে মহামংডপে
দেবেশং ভরতাদিভিঃ পরিবৃতং রামং ভজে শ্যামলম্ ॥ 48

সাকেতে শরদিংদুকুংদধবলে সৌঘে মহামংটপে ।
পর্যস্তাগরুধূপধূমপটলে কর্পূরদীপোজ্জ্বলে ।
সুগ্রীবাংগদবাযুপুত্রসহিতং সৌমিত্রিণা সেবিতং
লীলামানুষবিগ্রহং রঘুপতিং রামং ভজে শ্যামলম্ ॥ 49

শাংতং শারদচংদ্রকোটিসদৃশং চংদ্রাভিরামাননং
চংদ্রার্কাগ্নিবিকাসিকুংডলধরং চংদ্রাবতংসস্তুতম্ ।
বীণাপুস্তকসাক্ষসূত্রবিলসদ্ব্যাখ্যানমুদ্রাকরং
দেবেশং ভরতাদিভিঃ পরিবৃতং রামং ভজে শ্যামলম্ ॥ 50

রামং রাক্ষসমর্দনং রঘুপতিং শক্রারিবিধ্বংসিনং
সুগ্রীবেপ্সিতরাজ্যদং সুরপতেঃ পুত্রাংতকং শার্‍ংগিণম্ ।
ভক্তানামভযপ্রদং ভযহরং পাপৌঘবিধ্বংসিনং
সীতাসেবিতপাদপদ্মযুগলং রামং ভজে শ্যামলম্ ॥ 51

কংদর্পাযুতকোটিকোটিতুলিতং কালাংবুদশ্যামলং
কংবুগ্রীবমুদারকৌস্তুভধরং কর্ণাবতংসোত্পলম্ ।
কস্তূরীতিলকোজ্জ্বলং স্মিতমুখং চিন্মুদ্রযালংকৃতং
সীতালক্ষ্মণবাযুপুত্রসহিতং সিংহাসনস্থং ভজে ॥ 52

সাকেতে নবরত্নপংক্তিখচিতে চিত্রধ্বজালংকৃতে
বাসে স্বর্ণমযে দলাষ্টললিতে পদ্মে বিমানোত্তমে ।
আসীনং ভরতাদিসোদরজনৈঃ শাখামৃগৈঃ কিন্নরৈঃ
দিক্পালৈর্মুনিপুংগবৈর্নৃপগণৈস্সংসেব্যমানং ভজে ॥ 53

কস্তূরীঘনসারকুংকুমলসচ্ছ্রীচংদনালংকৃতং
কংদর্পাধিকসুংদরং ঘননিভং কাকুত্স্থবংশধ্বজম্ ।
কল্যাণাংভরবেষ্টিতং কমলযা যুক্তং কলাবল্লভং
কল্যাণাচলকার্মুকপ্রিযসখং কল্যাণরামং ভজে ॥ 54

মুক্তের্মূলং মুনিবরহৃদানংদকংদং মুকুংদং
কূটস্থাখ্যং সকলবরদং সর্বচৈতন্যরূপম্ ।
নাদাতীতং কমলনিলযং নাদনাদাংততত্ত্বং
নাদাতীতং প্রকৃতিরহিতং রামচংদ্রং ভজেঽহম্ ॥ 55

তারাকারং নিখিলনিলযং তত্ত্বমস্যাদিলক্ষ্যং
শব্দাবাচ্যং ত্রিগুণরহিতং ব্যোমমংগুষ্ঠমাত্রম্ ।
নির্বাণাখ্যং সগুণমগুণব্যোমরংধ্রাংতরস্থং
সৌষুম্নাংতঃ প্রণবসহিতং রামচংদ্রং ভজেঽহম্ ॥ 56

নিজানংদাকারং নিগমতুরগারাধিতপদং
পরব্রহ্মানংদং পরমপদগং পাপহরণম্ ।
কৃপাপারাবারং পরমপুরুষং পদ্মনিলযং
ভজে রামং শ্যামং প্রকৃতিরহিতং নির্গুণমহম্ ॥ 57

সাকেতে নগরে সমস্তমহিমাধারে জগন্মোহনে
রত্নস্তংভসহস্রমংটপমহাসিংহাসনে সাংবুজে ।
বিশ্বামিত্রবসিষ্ঠগৌতমশুকব্যাসাদিভির্মৌনিভিঃ
ধ্যেযং লক্ষ্মণলোকপালসহিতং সীতাসমেতং ভজে ॥ 58

রামং শ্যামাভিরামং রবিশশিনযনং কোটিসূর্যপ্রকাশং
দিব্যং দিব্যাস্ত্রপাণিং শরমুখশরধিং চারুকোডংডহস্তম্ ।
কালং কালাগ্নিরুদ্রং রিপুকুলদহনং বিঘ্নবিচ্ছেদদক্ষং
ভীমং ভীমাট্টহাসং সকলভযহরং রামচংদ্রং ভজেঽহম্ ॥ 59

শ্রীরামং ভুবনৈকসুংদরতনুং ধারাধরশ্যামলং
রাজীবাযতলোচনং রঘুবরং রাকেংদুবিংবাননম্ ।
কোদংডাদিনিজাযুধাশ্রিতভুজৈর্ভ্রাংতং বিদেহাত্মজা-
ধীশং ভক্তজনাবনং রঘুবরং শ্রীরামচংদ্রং ভজে ॥ 60

শ্রীবত্সাংকমুদারকৌস্তুভলসত্পীতাংবরালংকৃতং
নানারত্নবিরাজমানমকুটং নীলাংবুদশ্যামলম্ ।
কস্তূরীঘনসারচর্চিততনুং মংদারমালাধরং
কংদর্পাযুতসুংদরং রঘুপতিং সীতাসমেতং ভজে ॥ 61

সদানংদদেবে সহস্রারপদ্মে
গলচ্চংদ্রপীযূষধারামৃতাংতে ।
স্থিতং রামমূর্তিং নিষেবে নিষেবে-
ঽন্যদৈবং ন সেবে ন সেবে ন সেবে ॥ 62

সুধাভাসিতদ্বীপমধ্যে বিমানে
সুপর্বালিবৃক্ষোজ্জ্বলে শেষতল্পে ।
নিষণ্ণং রমাংকং নিষেবে নিষেবে-
ঽন্যদৈবং ন সেবে ন সেবে ন সেবে ॥ 63

চিদংশং সমানংদমানংদকংদং
সুষুম্নাখ্যরংধ্রাংতরালে চ হংসম্ ।
সচক্রং সশংখং সপীতাংবরাংকং
পরংচান্যদৈবং ন জানে ন জানে ॥ 64

চতুর্বেদকূটোল্লসত্কারণাখ্যং
স্ফুরদ্দিব্যবৈমানিকে ভোগিতল্পে ।
পরংধামমূর্তিং নিষণ্ণং নিষেবে
নিষেবেঽন্যদৈবং ন সেবে ন সেবে ॥ 65

সিংহাসনস্থং সুরসেবিতব্যং
রত্নাংকিতালংকৃতপাদপদ্মম্ ।
সীতাসমেতং শশিসূর্যনেত্রং
রামং ভজে রাঘব রামচংদ্রম্ ॥ 66

রামং পুরাণপুরুষং রমণীযবেষং
রাজাধিরাজমকুটার্চিতপাদপীঠম্ ।
সীতাপতিং সুনযনং জগদেকবীরং
শ্রীরামচংদ্রমনিশং কলযামি চিত্তে ॥ 67

পরানংদবস্তুস্বরূপাদিসাক্ষিং
পরব্রহ্মগম্যং পরংজ্যোতিমূর্তিম্ ।
পরাশক্তিমিত্রাঽপ্রিযারাধিতাংঘ্রিং
পরংধামরূপং ভজে রামচংদ্রম্ ॥ 68

মংদস্মিতং কুংডলগংডভাগং
পীতাংবরং ভূষণভূষিতাংগম্ ।
নীলোত্পলাংগং ভুবনৈকমিত্রং
রামং ভজে রাঘব রামচংদ্রম্ ॥ 69

অচিংত্যমব্যক্তমনংতরূপ-
মদ্বৈতমানংদমনাদিগম্যম্ ।
পুণ্যস্বরূপং পুরুষোত্তমাখ্যং
রামং ভজে রাঘব রামচংদ্রম্ ॥ 70

পদ্মাসনস্থং সুরসেবিতব্যং
পদ্মালযানংদকটাক্ষবীক্ষ্যম্ ।
গংধর্ববিদ্যাধরগীযমানং
রামং ভজে রাঘব রামচংদ্রম্ ॥ 71

অনংতকীর্তিং বরদং প্রসন্নং
পদ্মাসনং সেবকপারিজাতম্ ।
রাজাধিরাজং রঘুবীরকেতুং
রামং ভজে রাঘব রামচংদ্রম্ ॥ 72

সুগ্রীবমিত্রং সুজনানুরূপং
লংকাহরং রাক্ষসবংশনাশম্ ।
বেদাশ্রযাংগং বিপুলাযতাক্ষং
রামং ভজে রাঘব রামচংদ্রম্ ॥ 73

সকৃত্প্রণতরক্ষাযাং সাক্ষী যস্য বিভীষণঃ ।
সাপরাধপ্রতীকারঃ স শ্রীরামো গতির্মম ॥ 74

ফলমূলাশিনৌ দাংতৌ তাপসৌ ধর্মচারিণৌ ।
রক্ষঃকুলবিহংতারৌ ভ্রাতরৌ রামলক্ষ্মণৌ ॥ 75

তরুণৌ রূপসংপন্নৌ সুকুমারৌ মহাবলৌ ।
পুংডরীক বিশালাক্ষৌ চীরকৃষ্ণাজিনাংবরৌ ॥ 76

কৌসল্যানযনেংদুং দশরথমুখারবিংদমার্তাংডম্ ।
সীতামানসহংসং রামং রাজীবলোচনং বংদে ॥ 77

ভর্জনং ভববীজানাং মার্জনং সুখসংপদাম্ ।
তর্জনং যমদূতানাং রামরামেতি কীর্তনম্ ॥ 78

ন জানে জানকী জানে রাম ত্বন্নামবৈভবম্ ।
সর্বেশো ভগবান্ শংভুর্বাল্মীকির্বেত্তি বা নবা ॥ 79

করতলধৃতচাপং কালমেঘস্বরূপং
সরসিজদলনেত্রং চারুহাসং সুগাত্রম্ ।
বিচিনুতবনবাসং বিক্রমোদগ্রবেষং
প্রণমত রঘুনাথং জানকীপ্রাণনাথম্ ॥ 80

বিদ্যুত্স্ফুরন্মকরকুংডলদীপ্তচারু-
গংডস্থলং মণিকিরীটবিরাজমানম্ ।
পীতাংবরং জলদনীলমুদারকাংতিং
শ্রীরামচংদ্রমনিশং কলযামি চিত্তে ॥ 81

রত্নোল্লসজ্জ্বলিতকুংডলগংডভাগং
কস্তূরিকাতিলকশোভিতফালভাগম্ ।
কর্ণাংতদীর্ঘনযনং করুণাকটাক্ষং
শ্রীরামচংদ্র মুখমাত্মনি সন্নিধত্তম্ ॥ 82

বৈদেহীসহিতং চ লক্ষ্মণযুতং কৈকেযিপুত্রান্বিতং
সুগ্রীবং চ বিভীষণানিলসুতৌ নীলং নলং সাংগদম্ ।
বিশ্বামিত্রবসিষ্ঠগৌতমভরদ্বাজাদিকান্ মানযন্
রামো মারুতিসেবিতঃ স্মরতু মাং সাম্রাজ্যসিংহাসনে ॥ 83

সকলগুণনিধানং যোগিভিস্স্তূযমানং
ভজিতসুরবিমানং রক্ষিতেংদ্রাদিমানম্ ।
মহিতবৃষভযানং সীতযা শোভমানং
স্মরতু হৃদযভানুং ব্রহ্মরামাভিরামম্ ॥ 84

ত্রিদশকুমুদচংদ্রো দানবাংভোজচংদ্রো
দুরিততিমিরচংদ্রো যোগিনাং জ্ঞানচংদ্রঃ ।
প্রণতনযনচংদ্রো মৈথিলীনেত্রচংদ্রো
দশমুখরিপুচংদ্রঃ পাতু মাং রামচংদ্রঃ ॥ 85

যন্নামৈব সহস্রনামসদৃশং যন্নাম বেদৈস্সমং
যন্নামাংকিতবাক্য-মাসুরবলস্ত্রীগর্ভবিচ্ছেদনম্ ।
যন্নাম শ্বপচার্যভেদরহিতং মুক্তিপ্রদানোজ্জ্বলং
তন্নামাঽলঘুরামরামরমণং শ্রীরামনামামৃতম্ ॥ 86

রাজীবনেত্র রঘুপুংগব রামভদ্র
রাকেংদুবিংবসদৃশানন নীলগাত্র ।
রামাঽভিরাম রঘুবংশসমুদ্ভব ত্বং
শ্রীরামচংদ্র মম দেহি করাবলংবম্ ॥ 87

মাণিক্যমংজীরপদারবিংদং
রামার্কসংফুল্লমুখারবিংদম্ ।
ভক্তাভযপ্রাপিকরারবিংদাং
দেবীং ভজে রাঘববল্লভাং তাম্ ॥ 88

জযতু বিজযকারী জানকীমোদকারী
তপনকুলবিহারী দংডকারণ্যচারী ।
দশবদনকুঠারী দৈত্যবিচ্ছেদকারী
মণিমকুটকধারী চংডকোদংডধারী ॥ 89

রামঃ পিতা রঘব এব মাতা
রামস্সুবংধুশ্চ সখা হিতশ্চ ।
রামো গুরুর্মে পরমং চ দৈবং
রামং বিনা নাঽন্যমহং স্মরামি ॥ 90

শ্রীরাম মে ত্বং হি পিতা চ মাতা
শ্রীরাম মে ত্বং হি সুহৃচ্চ বংধুঃ ।
শ্রীরাম মে ত্বং হি গুরুশ্চ গোষ্ঠী
শ্রীরাম মে ত্বং হি সমস্তমেব ॥ 91

রামচংদ্রচরিতামৃতপানং
সোমপানশতকোটিসমানম্ ।
সোমপানশতকোটিভিরীযা-
জ্জন্ম নৈতি রঘুনাযকনাম্না ॥ 92

রাম রাম দযাসিংধো রাবণারে জগত্পতে ।
ত্বত্পাদকমলাসক্তি-র্ভবেজ্জন্মনি জন্মনি ॥ 93

শ্রীরামচংদ্রেতি দযাপরেতি
ভক্তপ্রিযেতি ভববংধনমোচনেতি ।
নাথেতি নাগশযনেতি সদা স্তুবংতং
মাং পাহি ভীতমনিশং কৃপণং কৃপালো ॥ 94

অযোধ্যানাথ রাজেংদ্র সীতাকাংত জগত্পতে ।
শ্রীরাম পুংডরীকাক্ষ রামচংদ্র নমোঽস্তু তে ॥ 95

হে রাম হে রমণ হে জগদেকবীর
হে নাথ হে রঘুপতে করুণালবাল ।
হে জানকীরমণ হে জগদেকবংধো
মাং পাহি দীনমনিশং কৃপণং কৃতঘ্নম্ ॥ 96

জানাতি রাম তব তত্ত্বগতিং হনূমান্ ।
জানাতি রাম তব সখ্যগতিং কপীশঃ ।
জানাতি রাম তব যুদ্ধগতিং দশাস্যো ।
জানাতি রাম ধনদানুজ এব সত্যম্ ॥ 97

সেব্যং শ্রীরামমংত্রং শ্রবণশুভকরং শ্রেষ্ঠসুজ্ঞানিমংত্রং
স্তব্যং শ্রীরামমংত্রং নরকদুরিতদুর্বারনির্ঘাতমংত্রম্ ।
ভব্যং শ্রীরামমংত্রং ভজতু ভজতু সংসারনিস্তারমংত্রং
দিব্যং শ্রীরামমংত্রং দিবি ভুবি বিলসন্মোক্ষরক্ষৈকমংত্রম্ ॥ 98

নিখিলনিলযমংত্রং নিত্যতত্ত্বাখ্যমংত্রং
ভবকুলহরমংত্রং ভূমিজাপ্রাণমংত্রম্ ।
পবনজনুতমংত্রং পার্বতীমোক্ষমংত্রং
পশুপতিনিজমংত্রং পাতু মাং রামমংত্রম্ ॥ 99

প্রণবনিলযমংত্রং প্রাণনির্বাণমংত্রং
প্রকৃতিপুরুষমংত্রং ব্রহ্মরুদ্রেংদ্রমংত্রম্ ।
প্রকটদুরিতরাগদ্বেষনির্ণাশমংত্রং
রঘুপতিনিজমংত্রং রামরামেতিমংত্রম্ ॥ 100

দশরথসুতমংত্রং দৈত্যসংহারমংত্রং
বিবুধবিনুতমংত্রং বিশ্ববিখ্যাতমংত্রম্ ।
মুনিগণনুতমংত্রং মুক্তিমার্গৈকমংত্রং
রঘুপতিনিজমংত্রং রামরামেতিমংত্রম্ ॥ 101

সংসারসাগরভযাপহবিশ্বমংত্রং
সাক্ষান্মুমুক্ষুজনসেবিতসিদ্ধমংত্রম্ ।
সারংগহস্তমুখহস্তনিবাসমংত্রং
কৈবল্যমংত্রমনিশং ভজ রামমংত্রম্ ॥ 102

জযতু জযতু মংত্রং জন্মসাফল্যমংত্রং
জননমরণভেদক্লেশবিচ্ছেদমংত্রম্ ।
সকলনিগমমংত্রং সর্বশাস্ত্রৈকমংত্রং
রঘুপতিনিজমংত্রং রামরামেতিমংত্রম্ ॥ 103

জগতি বিশদমংত্রং জানকীপ্রাণমংত্রং
বিবুধবিনুতমংত্রং বিশ্ববিখ্যাতমংত্রম্ ।
দশরথসুতমংত্রং দৈত্যসংহারমংত্রং
রঘুপতিনিজমংত্রং রামরামেতিমংত্রম্ ॥ 104

ব্রহ্মাদিযোগিমুনিপূজিতসিদ্ধমংত্রং
দারিদ্র্যদুঃখভবরোগবিনাশমংত্রম্ ।
সংসারসাগরসমুত্তরণৈকমংত্রং
বংদে মহাভযহরং রঘুরামমংত্রম্ ॥ 105

শত্রুচ্ছেদৈকমংত্রং সরসমুপনিষদ্বাক্যসংপূজ্যমংত্রং
সংসারোত্তারমংত্রং সমুচিতসমযে সংগনির্যাণমংত্রম্ ।
সর্বৈশ্বর্যৈকমংত্রং ব্যসনভুজগসংদষ্টসংত্রাণমংত্রং
জিহ্বে শ্রীরামমংত্রং জপ জপ সফলং জন্মসাফল্যমংত্রম্ ॥ 106

নিত্যং শ্রীরামমংত্রং নিরুপমমধিকং নীতিসুজ্ঞানমংত্রং
সত্যং শ্রীরামমংত্রং সদমলহৃদযে সর্বদারোগ্যমংত্রম্ ।
স্তুত্যং শ্রীরামমংত্রং সুললিতসুমনস্সৌখ্যসৌভাগ্যমংত্রং
পঠ্যং শ্রীরামমংত্রং পবনজবরদং পাতু মাং রামমংত্রম্ ॥ 107

ব্যামোহপ্রশমৌষধং মুনিমনোবৃত্তিপ্রবৃত্ত্যৌষধং
দৈত্যোন্মূলকরৌষধং ভবভযপ্রধ্বংসনৈকৌষধম্ ।
ভক্তানংদকরৌষধং ত্রিভুবনে সংজীবনৈকৌষধং
শ্রেযঃ প্রাপ্তিকরৌষধং পিব মনঃ শ্রীরামনামৌষধম্ ॥ 108

সকলভুবনরত্নং সর্বশাস্ত্রার্থরত্নং
সমরবিজযরত্নং সচ্চিদানংদরত্নম্ ।
দশমুখহররত্নং দানবারাতিরত্নং
রঘুকুলনৃপরত্নং পাতু মাং রামরত্নম্ ॥ 109

সকলভুবনরত্নং সচ্চিদানংদরত্নং
সকলহৃদযরত্নং সূর্যবিংবাংতরত্নম্ ।
বিমলসুকৃতরত্নং বেদবেদাংতরত্নং
পুরহরজপরত্নং পাতু মাং রামরত্নম্ ॥ 110

নিগমশিখররত্নং নির্মলানংদরত্নং
নিরুপমগুণরত্নং নাদনাদাংতরত্নম্ ।
দশরথকুলরত্নং দ্বাদশাংতস্স্থরত্নং
পশুপতিজপরত্নং পাতু মাং রামরত্নম্ ॥ 111

শতমখসুতরত্নং ষোডশাংতস্স্থরত্নং
মুনিজনজপরত্নং মুখ্যবৈকুংঠরত্নম্ ।
নিরুপমগুণরত্নং নীরজাংতস্স্থরত্নং
পরমপদবিরত্নং পাতু মাং রামরত্নম্ ॥ 112

সকলসুকৃতরত্নং সত্যবাক্যার্থরত্নং
শমদমগুণরত্নং শাশ্বতানংদরত্নম্ ।
প্রণযনিলযরত্নং প্রস্ফুটদ্যোতিরত্নং
পরমপদবিরত্নং পাতু মাং রামরত্নম্ ॥ 113

নিগমশিখররত্নং নিত্যমাশাস্যরত্নং
জননুতনৃপরত্নং জানকীরূপরত্নম্ ।
ভুবনবলযরত্নং ভূভুজামেকরত্নং
রঘুকুলবররত্নং পাতু মাং রামরত্নম্ ॥ 114

বিশালনেত্রং পরিপূর্ণগাত্রং
সীতাকলত্রং সুরবৈরিজৈত্রম্ ।
কারুণ্যপাত্রং জগতঃ পবিত্রং
শ্রীরামরত্নং প্রণতোঽস্মি নিত্যম্ ॥ 115

হে গোপালক হে দযাজলনিধে হে সদ্গুণাংভোনিধে
হে দৈত্যাংতক হে বিভীষণদযাপরীণ হে ভূপতে ।
হে বৈদেহসুতামনোজবিহৃতে হে কোটিমারাকৃতে
হে নব্যাংবুজনেত্র পালয পরং জানামি ন ত্বাং বিনা ॥ 116

যস্য কিংচিদপি নো হরণীযং
কর্ম কিংচিদপি নো চরণীযম্ ।
রামনাম চ সদা স্মরণীযং
লীলযা ভবজলং তরণীযম্ ॥ 117

দশরথসুতমীশং দংডকারণ্যবাসং
শতমখমণিনীলং জানকীপ্রাণলোলম্ ।
সকলভুবনমোহং সন্নুতাংভোদদেহং
বহুলনুতসমুদ্রং ভাবযে রামভদ্রম্ ॥ 118

বিশালনেত্রং পরিপূর্ণগাত্রং
সীতাকলত্রং সুরবৈরিজৈত্রম্ ।
জগত্পবিত্রং পরমাত্মতংত্রং
শ্রীরামচংদ্রং প্রণমামি চিত্তে ॥ 119

জয জয রঘুরাম শ্রীমুখাংভোজভানো
জয জয রঘুবীর শ্রীমদংভোজনেত্র ।
জয জয রঘুনাথ শ্রীকরাভ্যর্চিতাংঘ্রি
জয জয রঘুবর্য শ্রীশ কারুণ্যসিংধো ॥ 120

মংদারমূলে মণিপীঠসংস্থং
সুধাপ্লুতং দিব্যবিরাট্স্বরূপম্ ।
সবিংদুনাদাংতকলাংততুর্য-
মূর্তিং ভজেঽহং রঘুবংশরত্নম্ ॥ 121

নাদং নাদবিনীলচিত্তপবনং নাদাংতত্ত্বপ্রিযং
নামাকারবিবর্জিতং নবঘনশ্যামাংগনাদপ্রিযম্ ।
নাদাংভোজমরংদমত্তবিলসদ্ভৃংগং মদাংতস্স্থিতং
নাদাংতধৃবমংডলাব্জরুচিরং রামং ভজে তারকম্ ॥ 122

নানাভূতহৃদব্জপদ্মনিলযং নামোজ্জ্বলাভূষণম্ ।
নামস্তোত্রপবিত্রিতত্রিভুবনং নারাযণাষ্টাক্ষরম্ ।
নাদাংতেংদুগলত্সুধাপ্লুততনুং নানাত্মচিন্মাত্রকম্ ।
নানাকোটিযুগাংতভানুসদৃশং রামং ভজে তারকম্ ॥ 123

বেদ্যং বেদগুরুং বিরিংচিজনকং বেদাংতমূর্তিং স্ফুর-
দ্বেদং বেদকলাপমূলমহিমাধারাংতকংদাংকুরম্ ।
বেদশৃংগসমানশেষশযনং বেদাংতবেদ্যাত্মকং
বেদারাধিতপাদপংকজমহং রামং ভজে তারকম্ ॥ 124

মজ্জীবং মদনুগ্রহং মদধিপং মদ্ভাবনং মত্সুখং
মত্তাতং মম সদ্গুরুং মম বরং মোহাংধবিচ্ছেদনম্ ।
মত্পুণ্যং মদনেকবাংধবজনং মজ্জীবনং মন্নিধিং
মত্সিদ্ধিং মম সর্বকর্মসুকৃতং রামং ভজে তারকম্ ॥ 125

নিত্যং নীরজলোচনং নিরুপমং নীবারশূকোপমং
নির্ভেদানুভবং নিরংতরগুণং নীলাংগরাগোজ্জ্বলম্ ।
নিষ্পাপং নিগমাগমার্চিতপদং নিত্যাত্মকং নির্মলং
নিষ্পুণ্যং নিখিলং নিরংজনপদং রামং ভজে তারকম্ ॥ 126

ধ্যাযে ত্বাং হৃদযাংবুজে রঘুপতিং বিজ্ঞানদীপাংকুরং
হংসোহংসপরংপরাদিমহিমাধারং জগন্মোহনম্ ।
হস্তাংভোজগদাব্জচক্রমতুলং পীতাংবরং কৌস্তুভং
শ্রীবত্সং পুরুষোত্তমং মণিনিভং রামং ভজে তারকম্ ॥ 127

সত্যজ্ঞানমনংতমচ্যুতমজং চাব্যাকৃতং তত্পরং
কূটস্থাদিসমস্তসাক্ষিমনঘং সাক্ষাদ্বিরাট্তত্ত্বদম্ ।
বেদ্যং বিশ্বমযং স্বলীনভুবনস্বারাজ্যসৌখ্যপ্রদং
পূর্ণং পূর্ণতরং পুরাণপুরুষং রামং ভজে তারকম্ ॥ 128

রামং রাক্ষসবংশনাশনকরং রাকেংদুবিংবাননং
রক্ষোরিং রঘুবংশবর্ধনকরং রক্তাধরং রাঘবম্ ।
রাধাযাত্মনিবাসিনং রবিনিভং রম্যং রমানাযকং
রংধ্রাংতর্গতশেষশাযিনমহং রামং ভজে তারকম্ ॥ 129

ওতপ্রোতসমস্তবস্তুনিচযং ওংকারবীজাক্ষরং
ওংকারপ্রকৃতিং ষডক্ষরহিতং ওংকারকংদাংকুরম্ ।
ওংকারস্ফুটভূর্ভুবস্সুপরিতং ওঘত্রযারাধিতম্
ওংকারোজ্জ্বলসিংহপীঠনিলযং রামং ভজে তারকম্ ॥ 130

সাকেতে নগরে সমস্তসুখদে হর্ম্যেঽব্জকোটিদ্যুতে
নক্ষত্রগ্রহপংক্তিলগ্নশিখরে চাংতর্যপংকেরুহে ।
বাল্মীকাত্রিপরাশরাদিমুনিভিস্সংসেব্যমানং স্থিতং
সীতালংকৃতবামভাগমনিশং রামং ভজে তারকম্ ॥ 131

বৈকুংঠে নগরে সুরদ্রুমতলে চানংদবপ্রাংতরে
নানারত্নবিনির্মিতস্ফুটপটুপ্রাকারসংবেষ্টিতে ।
সৌধেংদূপলশেষতল্পললিতে নীলোত্পলচ্ছাদিতে
পর্যংকে শযনং রমাদিসহিতং রামং ভজে তারকম্ ॥ 132

বংদে রামমনাদিপূরুষমজং বংদে রমানাযকং
বংদে হারিকিরীটকুংডলধরং বংদে সুনীলদ্যুতিম্ ।
বংদে চাপকলংবকোজ্জ্বলকরং বংদে জগন্মংগলং
বংদে পংক্তিরথাত্মজং মম গুরুং বংদে সদা রাঘবম্ ॥ 133

বংদে শৌনকগৌতমাদ্যভিনুতং বংদে ঘনশ্যামলং
বংদে তারকপীঠমধ্যনিলযং বংদে জগন্নাযকম্ ।
বংদে ভক্তজনৌঘদেবিবটপং বংদে ধনুর্বল্লভং
বংদে তত্ত্বমসীতিবাক্যজনকং বংদে সদা রাঘবম্ ॥ 134

বংদে সূর্যশশাংকলোচনযুগং বংদে জগত্পাবনং
বংদে পত্রসহস্রপদ্মনিলযং বংদে পুরারিপ্রিযম্ ।
বংদে রাক্ষসবংশনাশনকরং বংদে সুধাশীতলং
বংদে দেবকপীংদ্রকোটিবিনুতং বংদে সদা রাঘবম্ ॥ 135

বংদে সাগরগর্বভংগবিশিখং বংদে জগজ্জীবনং
বংদে কৌশিকযাগরক্ষণকরং বংদে গুরুণাং গুরুম্ ।
বংদে বাণশরাসনোজ্জ্বলকরং বংদে জটাবল্কলং
বংদে লক্ষ্মণভূমিজান্বিতমহং বংদে সদা রাঘবম্ ॥ 136

বংদে পাংডরপুংডরীকনযনং বংদেঽব্জবিংবাননং
বংদে কংবুগলং করাব্জযুগলং বংদে ললাটোজ্জ্বলম্ ।
বংদে পীতদুকূলমংবুদনিভং বংদে জগন্মোহনং
বংদে কারণমানুষোজ্জ্বলতনুং বংদে সদা রাঘবম্ ॥ 137

বংদে নীলসরোজকোমলরুচিং বংদে জগদ্বংদিতং
বংদে সূর্যকুলাব্ধিকৌস্তুভমণিং বংদে সুরারাধিতম্ ।
বংদে পাতকপংচকপ্রহরণং বংদে জগত্কারণং
বংদে বিংশতিপংচতত্ত্বরহিতং বংদে সদা রাঘবম্ ॥ 138

বংদে সাধকবর্গকল্পকতরুং বংদে ত্রিমূর্ত্যাত্মকং
বংদে নাদলযাংতরস্থলগতং বংদে ত্রিবর্গাত্মকম্ ।
বংদে রাগবিহীনচিত্তসুলভং বংদে সভানাযকং
বংদে পূর্ণদযামৃতার্ণবমহং বংদে সদা রাঘবম্ ॥ 139

বংদে সাত্ত্বিকতত্ত্বমুদ্রিততনুং বংদে সুধাদাযকং
বংদে চারুচতুর্ভুজং মণিনিভং বংদে ষডব্জস্থিতম্ ।
বংদে ব্রহ্মপিপীলিকাদিনিলযং বংদে বিরাট্বিগ্রহং
বংদে পন্নগতল্পশাযিনমহং বংদে সদা রাঘবম্ ॥ 140

সিংহাসনস্থং মুনিসিদ্ধসেব্যং
রক্তোত্পলালংকৃতপাদপদ্মম্ ।
সীতাসমেতং শশিসূর্যনেত্রং
রামং ভজে রাঘবরামচংদ্রম্ ॥ 141

শ্রীরামভদ্রাশ্রিতসদ্গুরূণাং
পাদারবিংদং ভজতাং নরাণাম্ ।
আরোগ্যমৈশ্বর্যমনংতকীর্তি-
রংতে চ বিষ্ণোঃ পদমস্তি সত্যম্ ॥ 142

দশরথবরপুত্রং জানকীসত্কলত্রং
দশমুখহরদক্ষং পদ্মপত্রাযতাক্ষম্ ।
করধৃতশরচাপং চারুমুক্তাকলাপং
রঘুকুলনৃবরেণ্যং রামমীডে শরণ্যম্ ॥ 143

দশমুখগজসিংহং দৈত্যগর্বাতিরংহং
কদনভযদহস্তং তারকব্রহ্ম শস্তম্ ।
মণিখচিতকিরীটং মংজুলালাপবাটং
দশরথকুলচংদ্রং রামচংদ্রং ভজেঽহম্ ॥ 144

রামং রক্তসরোরুহাক্ষমমলং লংকাধিনাথাংতকং
কৌসল্যানযনোত্সুকং রঘুবরং নাগেংদ্রতল্পস্থিতম্ ।
বৈদেহীকুচকুংভকুংকুমরজোলংকারহারং হরিং
মাযামানুষবিগ্রহং রঘুপতিং সীতাসমেতং ভজে ॥ 145

রামং রাক্ষসমর্দনং রঘুবরং দৈতেযভিধ্বংসিনং
সুগ্রীবেপ্সিতরাজ্যদং সুরপতের্ভীত্যংতকং শার্‍ংগিণম্ ।
ভক্তানামভযপ্রদং ভযহরং পাপৌঘবিধ্বংসিনং
সামীরিস্তুতপাদপদ্মযুগলং সীতাসমেতং ভজে ॥ 146

যত্পাদাংবুজরেণুনা মুনিসতী মুক্তিংগতা যন্মহঃ
পুণ্যং পাতকনাশনং ত্রিজগতাং ভাতি স্মৃতং পাবনম্ ।
স্মৃত্বা রাঘবমপ্রমেযমমলং পূর্ণেংদুমংদস্মিতং
তং রামং সরসীরুহাক্ষমমলং সীতাসমেতং ভজে ॥ 147

বৈদেহীকুচমংডলাগ্র-বিলসন্মাণিক্যহস্তাংবুজং
চংচত্কংকণহারনূপুর-লসত্কেযূরহারান্বিতম্ ।
দিব্যশ্রীমণিকুংডলোজ্জ্বল-মহাভূষাসহস্রান্বিতং
বীরশ্রীরঘুপুংগবং গুণনিধিং সীতাসমেতং ভজে ॥ 148

বৈদেহীকুচমংডলোপরি-লসন্মাণিক্যহারাবলী-
মধ্যস্থং নবনীতকোমলরুচিং নীলোত্পলশ্যামলম্ ।
কংদর্পাযুতকোটিসুংদরতনুং পূর্ণেংদুবিংবাননং
কৌসল্যাকুলভূষণং রঘুপতিং সীতাসমেতং ভজে ॥ 149

দিব্যারণ্যযতীংদ্রনামনগরে মধ্যে মহামংটপে
স্বর্ণস্তংভসহস্রষোডশযুতে মংদারমূলাশ্রিতে ।
নানারত্নবিচিত্রনির্মলমহাসিংহাসনে সংস্থিতং
সীতালক্ষ্মণসেবিতং রঘুপতিং সীতাসমেতং ভজে ॥ 150

কস্তূরীতিলকং কপীংদ্রহরণং কারুণ্যবারাংনিধিং
ক্ষীরাংভোধিসুতামুখাব্জমধুপং কল্যাণসংপন্নিধিম্ ।
কৌসল্যানযনোত্সুকং কপিবরত্রাণং মহাপৌরুষং
কৌমারপ্রিযমর্ককোটিসদৃশং সীতাসমেতং ভজে ॥ 151

বিদ্যুত্কোটিদিবাকরদ্যুতিনিভং শ্রীকৌস্তুভালংকৃতং
যোগীংদ্রৈস্সনকাদিভিঃ পরিবৃতং কৈলাসনাথপ্রিযম্ ।
মুক্তারত্নকিরীটকুংডলধরং গ্রৈবেযহারান্বিতং
বৈদেহীকুচসন্নিবাসমনিশং সীতাসমেতং ভজে ॥ 152

মেঘশ্যামলমংবুজাতনযনং বিস্তীর্ণবক্ষস্স্থলং
বাহুদ্বংদ্ববিরাজিতং সুবদনং শোণাংঘ্রিপংকেরুহম্ ।
নানারত্নবিচিত্রভূষণযুতং কোদংডবাণাংকিতং
ত্রৈলোক্যাঽপ্রতিমানসুংদরতনুং সীতাসমেতং ভজে ॥ 153

বৈদেহীযুতবামভাগমতুলং বংদারুমংদারকং
বংদে প্রস্তুতকীর্তিবাসিততরুচ্ছাযানুকারিপ্রভম্ ।
বৈদেহীকুচকুংকুমাংকিতমহোরস্কং মহাভূষণং
বেদাংতৈরুপগীযমানমসকৃত্সীতাসমেতং ভজে ॥ 154

দেবানাং হিতকারণেন ভুবনে ধৃত্বাঽবতারং ধ্রুবং
রামং কৌশিকযজ্ঞবিঘ্নদলনং তত্তাটকাসংহরম্ ।
নিত্যং গৌতমপত্নিশাপদলনশ্রীপাদরেণুং শুভং
শংভোরুত্কটচাপখংডনমহাসত্বং ভজে রাঘবম্ ॥ 155

শ্রীরামং নবরত্নকুংডলধরং শ্রীরামরক্ষামণিং
শ্রীরামং চ সহস্রভানুসদৃশং শ্রীরামচংদ্রোদযম্ ।
শ্রীরামং শ্রুতকীর্তিমাকরমহং শ্রীরামমুক্তিপ্রদং
শ্রীরামং রঘুনংদনং ভযহরং শ্রীরামচংদ্রং ভজে ॥ 156

রামমিংদীবরশ্যামং রাজীবাযতলোচনম্ ।
জ্যাঘোষনির্জিতারাতিং জানকীরমণং ভজে ॥ 157

দীর্ঘবাহুমরবিংদলোচনং
দীনবত্সলমনাথরক্ষকম্ ।
দীক্ষিতং সকললোকরক্ষণে
দৈবতং দশরথাত্মজং ভজে ॥ 158

প্রাতস্স্মরামি রঘুনাথমুখারবিংদং
মংদস্মিতং মধুরভাষি বিশালফালম্ ।
কর্ণাবলংবিচলকুংডলগংডভাগং
কর্ণাংতদীর্ঘনযনং নযনাভিরামম্ ॥ 159

প্রাতর্ভজামি রঘুনাথকরারবিংদং
রক্ষোগণায ভযদং বরদং নিজেভ্যঃ ।
যদ্রাজসংসদি বিভিদ্য মহেশচাপং
সীতাকরগ্রহণমংগলমাপ সদ্যঃ ॥ 160

প্রাতর্নমামি রঘুনাথপদারবিংদং
পদ্মাংকুশাদিশুভরেখশুভাবহং চ ।
যোগীংদ্রমানসমধুব্রতসেব্যমানং
শাপাপহং সপদি গৌতমধর্মপত্ন্যাঃ ॥ 161

প্রাতর্বদামি বচসা রঘুনাথনাম
বাগ্দোষহারি সকলং কলুষং নিহংতৃ ।
যত্পার্বতী স্বপতিনা সহ ভোক্তুকামা
প্রীত্যা সহস্রহরিনামসমং জজাপ ॥ 162

প্রাতঃ শ্রযে শ্রুতিনুতং রঘুনাথমূর্তিং
নীলাংবুদোত্পলসিতেতররত্ননীলাম্ ।
আমুক্তমৌক্তিকবিশেষবিভূষণাঢ্যাং
ধ্যেযাং সমস্তমুনিভির্নিজভৃত্যমুখ্যৈঃ ॥ 163

রঘুকুলবরনাথো জানকীপ্রাণনাথঃ
পিতৃবচনবিধাতা কীশরাজ্যপ্রদাতা ।
প্রতিনিশিচরনাশঃ প্রাপ্তরাজ্যপ্রবেশো
বিহিতভুবনরক্ষঃ পাতু পদ্মাযতাক্ষঃ ॥ 164

কুবলযদলনীলঃ পীতবাসাঃ স্মিতাস্যো
বিবিধরুচিরভূষাভূষিতো দিব্যমূর্তিঃ ।
দশরথকুলনাথো জানকীপ্রাণনাথো
নিবসতু মম চিত্তে সর্বদা রামচংদ্রঃ ॥ 165

জযতু জযতু রামো জানকীবল্লভোঽযং
জযতু জযতু রামশ্চংদ্রচূডার্চিতাংঘ্রিঃ ।
জযতু জযতু বাণীনাথনাথঃ পরাত্মা
জযতু জযতু রামোঽনাথনাথঃ কৃপালুঃ ॥ 166

বদতু বদতু বাণী রামরামেতি নিত্যং
জযতু জযতু চিত্তং রামপাদারবিংদম্ ।
নমতু নমতু দেহং সংততং রামচংদ্রং
ন ভবতু মম পাপং জন্মজন্মাংতরেষু ॥ 167

আনংদরূপং বরদং প্রসন্নং
সিংহেক্ষণং সেবকপারিজাতম্ ।
নীলোত্পলাংগং ভুবনৈকমিত্রং
রামং ভজে রাঘবরামচংদ্রম্ ॥ 168

লংকাবিরামং রণরংগভীমং
রাজীবনেত্রং রঘুবংশমিত্রম্ ।
কারুণ্যমূর্তিং করুণাপ্রপূর্তিং
শ্রীরামচংদ্রং শরণং প্রপদ্যে ॥ 169

সুগ্রীবমিত্রং পরমং পবিত্রং
সীতাকলত্রং নবহেমসূত্রম্ ।
কারুণ্যপাত্রং শতপত্রনেত্রং
শ্রীরামচংদ্রং শিরসা নমামি ॥ 170

শ্রীরাঘবেতি রমণেতি রঘূদ্বহেতি
রামেতি রাবণহরেতি রমাধবেতি ।
সাকেতনাথসুমুখেতি চ সুব্রতেতি
বাণী সদা বদতু রাম হরে হরেতি ॥ 171

শ্রীরামনামামৃতমংত্রবীজং
সংজীবনং চেন্মনসি প্রতিষ্ঠম্ ।
হালাহলং বা প্রলযানলং বা
মৃত্যোর্মুখং বা বিতথীকরোতি ॥ 172

কিং যোগশাস্ত্রৈঃ কিমশেষবিদ্যা
কিং যাগগংগাদিবিশেষতীর্থৈঃ ।
কিং ব্রহ্মচর্যাশ্রমসংচরেণ
ভক্তির্নচেত্তে রঘুবংশকীর্ত্যাম্ ॥ 173

ইদং শরীরং শ্লথসংধিজর্ঝরং
পতত্যবশ্যং পরিণামপেশলম্ ।
কিমৌষথং পৃচ্ছসি মূঢ দুর্মতে
নিরামযং রামকথামৃতং পিব ॥ 174

হে রামভদ্রাশ্রয হে কৃপালো
হে ভক্তলোকৈকশরণ্যমূর্তে ।
পুনীহি মাং ত্বচ্চরণারবিংদং
জগত্পবিত্রং শরণং মমাঽস্তু ॥ 175

নীলাভ্রদেহ নিখিলেশ জগন্নিবাস
রাজীবনেত্র রমণীযগুণাভিরাম ।
শ্রীদাম দৈত্যকুলমর্দন রামচংদ্র
ত্বত্পাদপদ্মমনিশং কলযামি চিত্তে ॥ 176

শ্রীরামচংদ্র করুণাকর দীনবংধো
সীতাসমেত ভরতাগ্রজ রাঘবেশ ।
পাপার্তিভংজন ভযাতুরদীনবংধো
পাপাংবুধৌ পতিতমুদ্ধর মামনাথম্ ॥ 177

ইংদীবরদলশ্যাম-মিংদুকোটিনিভাননম্ ।
কংদর্পকোটিলাবণ্যং বংদেঽহং রঘুনংদনম্ ॥ 175

ইতি শ্রীবোধেংদ্রসরস্বতী কৃত শ্রীরামকর্ণামৃতম্ ॥