ରାମ କର୍ଣାମୃତମ | Rama Karnamrutham In Odia

Also Read This In:- Bengali, English, Gujarati, Hindi, Kannada, Marathi, Malayalam, Punjabi, Sanskrit, Tamil, Telugu.

ମଂଗଳଶ୍ଲୋକାଃ
ମଂଗଳଂ ଭଗଵାନ୍ଵିଷ୍ଣୁର୍ମଂଗଳଂ ମଧୁସୂଦନଃ ।
ମଂଗଳଂ ପୁଂଡରୀକାକ୍ଷୋ ମଂଗଳଂ ଗରୁଡଧ୍ଵଜଃ ॥ 1

ମଂଗଳଂ କୋସଲେଂଦ୍ରାୟ ମହନୀୟଗୁଣାବ୍ଧୟେ ।
ଚକ୍ରଵର୍ତିତନୂଜାୟ ସାର୍ଵଭୌମାୟ ମଂଗଳମ୍ ॥ 2

ଵେଦଵେଦାଂତଵେଦ୍ୟାୟ ମେଘଶ୍ୟାମଲମୂର୍ତୟେ ।
ପୁଂସାଂ ମୋହନରୂପାୟ ପୁଣ୍ୟଶ୍ଲୋକାୟ ମଂଗଳମ୍ ॥ 3

ଵିଶ୍ଵାମିତ୍ରାଂତରଂଗାୟ ମିଥିଲାନଗରୀପତେଃ ।
ଭାଗ୍ୟାନାଂ ପରିପାକାୟ ଭଵ୍ୟରୂପାୟ ମଂଗଳମ୍ ॥ 4

ପିତୃଭକ୍ତାୟ ସତତଂ ଭ୍ରାତୃଭିଃ ସହ ସୀତୟା ।
ନଂଦିତାଖିଲଲୋକାୟ ରାମଚଂଦ୍ରାୟ ମଂଗଳମ୍ ॥ 5

ତ୍ୟକ୍ତସାକେତଵାସାୟ ଚିତ୍ରକୂଟଵିହାରିଣେ ।
ସେଵ୍ୟାୟ ସର୍ଵୟମିନାଂ ଧୀରୋଦାତ୍ତାୟ ମଂଗଳମ୍ ॥ 6

ସୌମିତ୍ରିଣା ଚ ଜାନକ୍ୟା ଚାପବାଣାସିଧାରିଣା ।
ସଂସେଵ୍ୟାୟ ସଦା ଭକ୍ତ୍ୟା ସାନୁଜାୟାସ୍ତୁ ମଂଗଳମ୍ ॥ 7

ଦଂଡକାରଣ୍ୟଵାସାୟ ଖଂଡିତାମରଶତ୍ରଵେ ।
ଗୃଧ୍ରରାଜାୟ ଭକ୍ତାୟ ମୁକ୍ତିଦାୟାସ୍ତୁ ମଂଗଳମ୍ ॥ 8

ସାଦରଂ ଶବରୀଦତ୍ତଫଲମୂଲାଭିଲାଷିଣେ ।
ସୌଲଭ୍ୟପରିପୂର୍ଣାୟ ସତ୍ତ୍ଵୋଦ୍ୟୁକ୍ତାୟ ମଂଗଳମ୍ ॥ 9

ହନୂମତ୍ସମଵେତାୟ ହରୀଶାଭୀଷ୍ଟଦାୟିନେ ।
ଵାଲିପ୍ରମଥନାୟାସ୍ତୁ ମହାଧୀରାୟ ମଂଗଳମ୍ ॥ 10

ଶ୍ରୀମତେ ରଘୁଵୀରାୟ ସେତୁଲଂଘିତସିଂଧଵେ ।
ଜିତରାକ୍ଷସରାଜାୟ ରଣଧୀରାୟ ମଂଗଳମ୍ ॥ 11

ଆସାଦ୍ୟ ନଗରୀଂ ଦିଵ୍ୟାମଭିଷିକ୍ତାୟ ସୀତୟା ।
ରାଜାଧିରାଜରାଜାୟ ରାମଭଦ୍ରାୟ ମଂଗଳମ୍ ॥ 12

ଵିଭୀଷଣକୃତେ ପ୍ରୀତ୍ୟା ଵିଶ୍ଵାଭୀଷ୍ଟପ୍ରଦାୟିନେ ।
ଜାନକୀପ୍ରାଣନାଥାୟ ସଦା ରାମାୟ ମଂଗଳମ୍ ॥ 13

—-

ଶ୍ରୀରାମଂ ତ୍ରିଜଗଦ୍ଗୁରୁଂ ସୁରଵରଂ ସୀତାମନୋନାୟକଂ
ଶ୍ୟାମାଂଗଂ ଶଶିକୋଟିପୂର୍ଣଵଦନଂ ଚଂଚତ୍କଲାକୌସ୍ତୁଭମ୍ ।
ସୌମ୍ୟଂ ସତ୍ୟଗୁଣୋତ୍ତମଂ ସୁସରୟୂତୀରେ ଵସଂତଂ ପ୍ରଭୁଂ
ତ୍ରାତାରଂ ସକଲାର୍ଥସିଦ୍ଧିସହିତଂ ଵଂଦେ ରଘୂଣାଂ ପତିମ୍ ॥ 14

ଶ୍ରୀରାଘଵଂ ଦଶରଥାତ୍ମଜମପ୍ରମେୟଂ
ସୀତାପତିଂ ରଘୁଵରାନ୍ଵୟରତ୍ନଦୀପମ୍ ।
ଆଜାନୁବାହୁମରଵିଂଦଦଳାୟତାକ୍ଷଂ
ରାମଂ ନିଶାଚରଵିନାଶକରଂ ନମାମି ॥ 15

ଶ୍ରୀରାମଚଂଦ୍ର କରୁଣାକର ରାଘଵେଂଦ୍ର
ରାଜେଂଦ୍ରଚଂଦ୍ର ରଘୁଵଂଶସମୁଦ୍ରଚଂଦ୍ର ।
ସୁଗ୍ରୀଵନେତ୍ରୟୁଗଳୋତ୍ପଲ-ପୂର୍ଣଚଂଦ୍ର
ସୀତାମନଃକୁମୁଦଚଂଦ୍ର ନମୋ ନମସ୍ତେ ॥ 16

ସୀତାମନୋମାନସରାଜହଂସ
ସଂସାରସଂତାପହର କ୍ଷମାଵନ୍ ।
ଶ୍ରୀରାମ ଦୈତ୍ୟାଂତକ ଶାଂତରୂପ
ଶ୍ରୀତାରକବ୍ରହ୍ମ ନମୋ ନମସ୍ତେ ॥ 17

ଵିଷ୍ଣୋ ରାଘଵ ଵାସୁଦେଵ ନୃହରେ ଦେଵୌଘଚୂଡାମଣେ ।
ସଂସାରାର୍ଣଵକର୍ଣଧାରକ ହରେ କୃଷ୍ଣାୟ ତୁଭ୍ୟଂ ନମଃ ॥ 18

ସୁଗ୍ରୀଵାଦିସମସ୍ତଵାନରଵରୈସ୍ସଂସେଵ୍ୟମାନଂ ସଦା ।
ଵିଶ୍ଵାମିତ୍ରପରାଶରାଦିମୁନିଭିସ୍ସଂସ୍ତୂୟମାନଂ ଭଜେ ॥ 19

ରାମଂ ଚଂଦନଶୀତଲଂ କ୍ଷିତିସୁତାମୋହାକରଂ ଶ୍ରୀକରଂ
ଵୈଦେହୀନୟନାରଵିଂଦମିହିରଂ ସଂପୂର୍ଣଚଂଦ୍ରାନନମ୍ ।
ରାଜାନଂ କରୁଣାସମେତନୟନଂ ସୀତାମନୋନଂଦନଂ
ସୀତାଦର୍ପଣଚାରୁଗଂଡଲଲିତଂ ଵଂଦେ ସଦା ରାଘଵମ୍ ॥ 20

ଜାନାତି ରାମ ତଵ ନାମରୁଚିଂ ମହେଶୋ
ଜାନାତି ଗୌତମସତୀ ଚରଣପ୍ରଭାଵମ୍ ।
ଜାନାତି ଦୋର୍ବଲପରାକ୍ରମମୀଶଚାପୋ
ଜାନାତ୍ୟମୋଘପଟୁବାଣଗତିଂ ପୟୋଧିଃ ॥ 21

ମାତା ରାମୋ ମତ୍ପିତା ରାମଚଂଦ୍ରୋ
ଭ୍ରାତା ରାମୋ ମତ୍ସଖା ରାଘଵେଶଃ ।
ସର୍ଵସ୍ଵଂ ମେ ରାମଚଂଦ୍ରୋ ଦାୟାଳୁ-
ର୍ନାନ୍ୟଂ ଦୈଵଂ ନୈଵ ଜାନେ ନ ଜାନେ ॥ 22

ଵିମଲକମଲନେତ୍ରଂ ଵିସ୍ଫୁରନ୍ନୀଲଗାତ୍ରଂ
ତପନକୁଲପଵିତ୍ରଂ ଦାନଵଧ୍ଵଂତମିତ୍ରମ୍ ।
ଭୁଵନଶୁଭଚରିତ୍ରଂ ଭୂମିପୁତ୍ରୀକଳତ୍ରଂ
ଦଶରଥଵରପୁତ୍ରଂ ନୌମି ରାମାଖ୍ୟମିତ୍ରମ୍ ॥ 23

ମାର୍ଗେ ମାର୍ଗେ ଶାଖିନାଂ ରତ୍ନଵେଦୀ
ଵେଦ୍ୟାଂ ଵେଦ୍ୟାଂ କିନ୍ନରୀବୃଂଦଗୀତମ୍ ।
ଗୀତେ ଗୀତେ ମଂଜୁଲାଲାପଗୋଷ୍ଠୀ
ଗୋଷ୍ଠ୍ୟାଂ ଗୋଷ୍ଠ୍ୟାଂ ତ୍ଵତ୍କଥା ରାମଚଂଦ୍ର ॥ 24

ଵୃକ୍ଷେ ଵୃକ୍ଷେ ଵୀକ୍ଷିତାଃ ପକ୍ଷିସଂଘାଃ
ସଂଘେ ସଂଘେ ମଂଜୁଲାମୋଦଵାକ୍ୟମ୍ ।
ଵାକ୍ୟେ ଵାକ୍ୟେ ମଂଜୁଲାଲାପଗୋଷ୍ଠୀ
ଗୋଷ୍ଠ୍ୟାଂ ଗୋଷ୍ଠ୍ୟାଂ ତ୍ଵତ୍କଥା ରାମଚଂଦ୍ର ॥ 25

ଦୁରିତତିମିରଚଂଦ୍ରୋ ଦୁଷ୍ଟକଂଜାତଚଂଦ୍ରଃ
ସୁରକୁଵଲୟଚଂଦ୍ରସ୍ସୂର୍ୟଵଂଶାବ୍ଧିଚଂଦ୍ରଃ ।
ସ୍ଵଜନନିଵହଚଂଦ୍ରଶ୍ଶତ୍ରୁରାଜୀଵଚଂଦ୍ରଃ
ପ୍ରଣତକୁମୁଦଚଂଦ୍ରଃ ପାତୁ ମାଂ ରାମଚଂଦ୍ରଃ ॥ 26

କଳ୍ୟାଣଦଂ କୌଶିକୟଜ୍ଞପାଲଂ
କଳାନିଧିଂ କାଂଚନଶୈଲଧୀରମ୍ ।
କଂଜାତନେତ୍ରଂ କରୁଣାସମୁଦ୍ରଂ
କାକୁତ୍ସ୍ଥରାମଂ କଲୟାମି ଚିତ୍ତେ ॥ 27

ରାଜୀଵାୟତଲୋଚନଂ ରଘୁଵରଂ ନୀଲୋତ୍ପଲଶ୍ୟାମଲଂ
ମଂଦାରାଂଚିତମଂଡପେ ସୁଲଲିତେ ସୌଵର୍ଣକେ ପୁଷ୍ପକେ ।
ଆସ୍ଥାନେ ନଵରତ୍ନରାଜିଖଚିତେ ସିଂହାସନେ ସଂସ୍ଥିତଂ
ସୀତାଲକ୍ଷ୍ମଣଲୋକପାଲସହିତଂ ଵଂଦେ ମୁନୀଂଦ୍ରାସ୍ପଦମ୍ ॥ 28

ଧ୍ୟାୟେ ରାମଂ ସୁଧାଂଶୁଂ ନତସକଲଭଵାରଣ୍ୟତାପପ୍ରହାରମ୍ ।
ଶ୍ୟାମଂ ଶାଂତଂ ସୁରେଂଦ୍ରଂ ସୁରମୁନିଵିନୁତଂ କୋଟିସୂର୍ୟପ୍ରକାଶମ୍ ।
ସୀତାସୌମିତ୍ରିସେଵ୍ୟଂ ସୁରନରସୁଗମଂ ଦିଵ୍ୟସିଂହାସନସ୍ଥମ୍ ।
ସାୟାହ୍ନେ ରାମଚଂଦ୍ରଂ ସ୍ମିତରୁଚିରମୁଖଂ ସର୍ଵଦା ମେ ପ୍ରସନ୍ନମ୍ ॥ 29

ଇଂଦ୍ରନୀଲମଣିସନ୍ନିଭଦେହଂ
ଵଂଦନୀୟମସକୃନ୍ମୁନିବୃଂଦୈଃ ।
ଲଂବମାନତୁଲସୀଵନମାଲଂ
ଚିଂତୟାମି ସତତଂ ରଘୁଵୀରମ୍ ॥ 30

ସଂପୂର୍ଣଚଂଦ୍ରଵଦନଂ ସରସୀରୁହାକ୍ଷଂ
ମାଣିକ୍ୟକୁଂଡଲଧରଂ ମୁକୁଟାଭିରାମମ୍ ।
ଚାଂପେୟଗୌରଵସନଂ ଶରଚାପହସ୍ତଂ
ଶ୍ରୀରାମଚଂଦ୍ରମନିଶଂ ମନସା ସ୍ମରାମି ॥ 31

ମାତୁଃ ପାର୍ଶ୍ଵେ ଚରଂତଂ ମଣିମୟଶୟନେ ମଂଜୁଭୂଷାଂଚିତାଂଗମ୍ ।
ମଂଦଂ ମଂଦଂ ପିବଂତଂ ମୁକୁଳିତନୟନଂ ସ୍ତନ୍ୟମନ୍ୟସ୍ତନାଗ୍ରମ୍ ।
ଅଂଗୁଳ୍ୟାଗ୍ରୈଃ ସ୍ପୃଶଂତଂ ସୁଖପରଵଶୟା ସସ୍ମିତାଲିଂଗିତାଂଗମ୍ ।
ଗାଢଂ ଗାଢଂ ଜନନ୍ୟା କଲୟତୁ ହୃଦୟଂ ମାମକଂ ରାମବାଲମ୍ ॥ 32

ରାମାଭିରାମଂ ନୟନାଭିରାମଂ
ଵାଚାଭିରାମଂ ଵଦନାଭିରାମମ୍ ।
ସର୍ଵାଭିରାମଂ ଚ ସଦାଭିରାମଂ
ଵଂଦେ ସଦା ଦାଶରଥିଂ ଚ ରାମମ୍ ॥ 33

ରାଶବ୍ଦୋଚ୍ଚାରମାତ୍ରେଣ ମୁଖାନ୍ନିର୍ୟାତି ପାତକାଃ ।
ପୁନଃ ପ୍ରଵେଶଭୀତ୍ୟା ଚ ମକାରସ୍ତୁ କଵାଟଵତ୍ ॥ 34

ଅନର୍ଘମାଣିକ୍ୟଵିରାଜମାନ-
ଶ୍ରୀପାଦୁକାଲଂକୃତଶୋଭନାଭ୍ୟାମ୍ ।
ଅଶେଷବୃଂଦାରକଵଂଦିତାଭ୍ୟାଂ
ନମୋ ନମୋ ରାମପଦାଂବୁଜାଭ୍ୟାମ୍ ॥ 35

ଚଲତ୍କନକକୁଂଡଲୋଲ୍ଲସିତଦିଵ୍ୟଗଂଡସ୍ଥଲଂ
ଚରାଚରଜଗନ୍ମୟଂ ଚରଣପଦ୍ମଗଂଗାଶ୍ରୟମ୍ ।
ଚତୁର୍ଵିଧଫଲପ୍ରଦଂ ଚରମପୀଠମଧ୍ୟସ୍ଥିତଂ
ଚିଦଂଶମଖିଲାସ୍ପଦଂ ଦଶରଥାତ୍ମଜଂ ଚିଂତୟେ ॥ 36

ସନଂଦନମୁନିପ୍ରିୟଂ ସକଲଵର୍ଣଵେଦାତ୍ମକଂ
ସମସ୍ତନିଗମାଗମସ୍ଫୁରିତତତ୍ତ୍ଵସିଂହାସନମ୍ ।
ସହସ୍ରନୟନାବ୍ଜଜାଦ୍ୟମରବୃଂଦସଂସେଵିତଂ
ସମଷ୍ଟିପୁରଵଲ୍ଲଭଂ ଦଶରଥାତ୍ମଜଂ ଚିଂତୟେ ॥ 37

ଜାଗ୍ରତ୍ସ୍ଵପ୍ନସୁଷୁପ୍ତି-କାଲଵିଲସତ୍ତତ୍ତ୍ଵାତ୍ମଚିନ୍ମାତ୍ରକଂ
ଚୈତନ୍ୟାତ୍ମକମାଧିପାପରହିତଂ ଭୂମ୍ୟାଦିତନ୍ମାତ୍ରକମ୍ ।
ଶାଂଭଵ୍ୟାଦିସମସ୍ତୟୋଗକୁଲକଂ ସାଂଖ୍ୟାଦିତତ୍ତ୍ଵାତ୍ପରଂ
ଶବ୍ଦାଵାଚ୍ୟମହଂ ନମାମି ସତତଂ ଵ୍ୟୁତ୍ପତ୍ତିନାଶାତ୍ପରମ୍ ॥ 38

ଇକ୍ଷ୍ଵାକୁଵଂଶାର୍ଣଵଜାତରତ୍ନଂ
ସୀତାଂଗନାୟୌଵନଭାଗ୍ୟରତ୍ନମ୍ ।
ଵୈକୁଂଠରତ୍ନଂ ମମ ଭାଗ୍ୟରତ୍ନଂ
ଶ୍ରୀରାମରତ୍ନଂ ଶିରସା ନମାମି ॥ 39

ଇକ୍ଷ୍ଵାକୁନଂଦନଂ ସୁଗ୍ରୀଵପୂଜିତଂ
ତ୍ରୈଲୋକ୍ୟରକ୍ଷକଂ ସତ୍ୟସଂଧଂ ସଦା ।
ରାଘଵଂ ରଘୁପତିଂ ରାଜୀଵଲୋଚନଂ
ରାମଚଂଦ୍ରଂ ଭଜେ ରାଘଵେଶଂ ଭଜେ ॥ 40

ଭକ୍ତପ୍ରିୟଂ ଭକ୍ତସମାଧିଗମ୍ୟଂ
ଚିଂତାହରଂ ଚିଂତିତକାମଧେନୁମ୍ ।
ସୂର୍ୟେଂଦୁକୋଟିଦ୍ୟୁତିଭାସ୍ଵରଂ ତଂ
ରାମଂ ଭଜେ ରାଘଵରାମଚଂଦ୍ରମ୍ ॥ 41

ଶ୍ରୀରାମଂ ଜନକକ୍ଷିତୀଶ୍ଵରସୁତାଵକ୍ତ୍ରାଂବୁଜାହାରିଣଂ
ଶ୍ରୀମଦ୍ଭାନୁକୁଲାବ୍ଧିକୌସ୍ତୁଭମଣିଂ ଶ୍ରୀରତ୍ନଵକ୍ଷସ୍ସ୍ଥଲମ୍ ।
ଶ୍ରୀକଂଠାଦ୍ୟମରୌଘରତ୍ନମକୁଟାଲଂକାରପାଦାଂବୁଜଂ
ଶ୍ରୀଵତ୍ସୋଜ୍ଜ୍ଵଲମିଂଦ୍ରନୀଲସଦୃଶଂ ଶ୍ରୀରାମଚଂଦ୍ରଂ ଭଜେ ॥ 42

ରାମଚଂଦ୍ର ଚରିତାକଥାମୃତଂ
ଲକ୍ଷ୍ମଣାଗ୍ରଜଗୁଣାନୁକୀର୍ତନମ୍ ।
ରାଘଵେଶ ତଵ ପାଦସେଵନଂ
ସଂଭଵଂତୁ ମମ ଜନ୍ମଜନ୍ମନି ॥ 43

ଅଜ୍ଞାନସଂଭଵ-ଭଵାଂବୁଧିବାଡବାଗ୍ନି-
ରଵ୍ୟକ୍ତତତ୍ତ୍ଵନିକରପ୍ରଣଵାଧିରୂଢଃ ।
ସୀତାସମେତମନୁଜେନ ହୃଦଂତରାଳେ
ପ୍ରାଣପ୍ରୟାଣସମୟେ ମମ ସନ୍ନିଧତ୍ତେ ॥ 44

ରାମୋ ମତ୍କୁଲଦୈଵତଂ ସକରୁଣଂ ରାମଂ ଭଜେ ସାଦରଂ
ରାମେଣାଖିଲଘୋରପାପନିହତୀ ରାମାୟ ତସ୍ମୈ ନମଃ ।
ରାମାନ୍ନାସ୍ତି ଜଗତ୍ରୟୈକସୁଲଭୋ ରାମସ୍ୟ ଦାସୋଽସ୍ମ୍ୟହଂ
ରାମେ ପ୍ରୀତିରତୀଵ ମେ କୁଲଗୁରୋ ଶ୍ରୀରାମ ରକ୍ଷସ୍ଵ ମାମ୍ ॥ 45

ଵୈଦେହୀସହିତଂ ସୁରଦ୍ରୁମତଲେ ହୈମେ ମହାମଂଟପେ ।
ମଧ୍ୟେପୁଷ୍ପକମାସନେ ମଣିମୟେ ଵୀରାସନେ ସଂସ୍ଥିତମ୍ ।
ଅଗ୍ରେ ଵାଚୟତି ପ୍ରଭଂଜନସୁତେ ତତ୍ତ୍ଵଂ ମୁନିଭ୍ୟଃ ପରମ୍ ।
ଵ୍ୟାଖ୍ୟାଂତଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ୟାମଲମ୍ ॥ 46

ଵାମେ ଭୂମିସୁତା ପୁରସ୍ତୁ ହନୁମାନ୍ପଶ୍ଚାତ୍ସୁମିତ୍ରାସୁତ-
ଶ୍ଶତ୍ରୁଘ୍ନୋ ଭରତଶ୍ଚ ପାର୍ଶ୍ଵଦଳୟୋର୍ଵାୟ୍ଵାଦିକୋଣେଷ୍ଵପି ।
ସୁଗ୍ରୀଵଶ୍ଚ ଵିଭୀଷଣଶ୍ଚ ୟୁଵରାଟ୍ ତାରାସୁତୋ ଜାଂବଵାନ୍
ମଧ୍ୟେ ନୀଲସରୋଜକୋମଲରୁଚିଂ ରାମଂ ଭଜେ ଶ୍ୟାମଲମ୍ ॥ 47

କେୟୂରାଂଗଦକଂକଣୈର୍ମଣିଗଣୈର୍ଵୈରୋଚମାନଂ ସଦା
ରାକାପର୍ଵଣିଚଂଦ୍ରକୋଟିସଦୃଶଂ ଛତ୍ରେଣ ଵୈରାଜିତମ୍ ।
ହେମସ୍ତଂଭସହସ୍ରଷୋଡଶୟୁତେ ମଧ୍ୟେ ମହାମଂଡପେ
ଦେଵେଶଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ୟାମଲମ୍ ॥ 48

ସାକେତେ ଶରଦିଂଦୁକୁଂଦଧଵଳେ ସୌଘେ ମହାମଂଟପେ ।
ପର୍ୟସ୍ତାଗରୁଧୂପଧୂମପଟଲେ କର୍ପୂରଦୀପୋଜ୍ଜ୍ଵଲେ ।
ସୁଗ୍ରୀଵାଂଗଦଵାୟୁପୁତ୍ରସହିତଂ ସୌମିତ୍ରିଣା ସେଵିତଂ
ଲୀଲାମାନୁଷଵିଗ୍ରହଂ ରଘୁପତିଂ ରାମଂ ଭଜେ ଶ୍ୟାମଲମ୍ ॥ 49

ଶାଂତଂ ଶାରଦଚଂଦ୍ରକୋଟିସଦୃଶଂ ଚଂଦ୍ରାଭିରାମାନନଂ
ଚଂଦ୍ରାର୍କାଗ୍ନିଵିକାସିକୁଂଡଲଧରଂ ଚଂଦ୍ରାଵତଂସସ୍ତୁତମ୍ ।
ଵୀଣାପୁସ୍ତକସାକ୍ଷସୂତ୍ରଵିଲସଦ୍ଵ୍ୟାଖ୍ୟାନମୁଦ୍ରାକରଂ
ଦେଵେଶଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ୟାମଲମ୍ ॥ 50

ରାମଂ ରାକ୍ଷସମର୍ଦନଂ ରଘୁପତିଂ ଶକ୍ରାରିଵିଧ୍ଵଂସିନଂ
ସୁଗ୍ରୀଵେପ୍ସିତରାଜ୍ୟଦଂ ସୁରପତେଃ ପୁତ୍ରାଂତକଂ ଶାର୍‍ଂଗିଣମ୍ ।
ଭକ୍ତାନାମଭୟପ୍ରଦଂ ଭୟହରଂ ପାପୌଘଵିଧ୍ଵଂସିନଂ
ସୀତାସେଵିତପାଦପଦ୍ମୟୁଗଳଂ ରାମଂ ଭଜେ ଶ୍ୟାମଲମ୍ ॥ 51

କଂଦର୍ପାୟୁତକୋଟିକୋଟିତୁଲିତଂ କାଲାଂବୁଦଶ୍ୟାମଲଂ
କଂବୁଗ୍ରୀଵମୁଦାରକୌସ୍ତୁଭଧରଂ କର୍ଣାଵତଂସୋତ୍ପଲମ୍ ।
କସ୍ତୂରୀତିଲକୋଜ୍ଜ୍ଵଲଂ ସ୍ମିତମୁଖଂ ଚିନ୍ମୁଦ୍ରୟାଲଂକୃତଂ
ସୀତାଲକ୍ଷ୍ମଣଵାୟୁପୁତ୍ରସହିତଂ ସିଂହାସନସ୍ଥଂ ଭଜେ ॥ 52

ସାକେତେ ନଵରତ୍ନପଂକ୍ତିଖଚିତେ ଚିତ୍ରଧ୍ଵଜାଲଂକୃତେ
ଵାସେ ସ୍ଵର୍ଣମୟେ ଦଳାଷ୍ଟଲଲିତେ ପଦ୍ମେ ଵିମାନୋତ୍ତମେ ।
ଆସୀନଂ ଭରତାଦିସୋଦରଜନୈଃ ଶାଖାମୃଗୈଃ କିନ୍ନରୈଃ
ଦିକ୍ପାଲୈର୍ମୁନିପୁଂଗଵୈର୍ନୃପଗଣୈସ୍ସଂସେଵ୍ୟମାନଂ ଭଜେ ॥ 53

କସ୍ତୂରୀଘନସାରକୁଂକୁମଲସଚ୍ଛ୍ରୀଚଂଦନାଲଂକୃତଂ
କଂଦର୍ପାଧିକସୁଂଦରଂ ଘନନିଭଂ କାକୁତ୍ସ୍ଥଵଂଶଧ୍ଵଜମ୍ ।
କଳ୍ୟାଣାଂଭରଵେଷ୍ଟିତଂ କମଲୟା ୟୁକ୍ତଂ କଲାଵଲ୍ଲଭଂ
କଳ୍ୟାଣାଚଲକାର୍ମୁକପ୍ରିୟସଖଂ କଳ୍ୟାଣରାମଂ ଭଜେ ॥ 54

ମୁକ୍ତେର୍ମୂଲଂ ମୁନିଵରହୃଦାନଂଦକଂଦଂ ମୁକୁଂଦଂ
କୂଟସ୍ଥାଖ୍ୟଂ ସକଲଵରଦଂ ସର୍ଵଚୈତନ୍ୟରୂପମ୍ ।
ନାଦାତୀତଂ କମଲନିଲୟଂ ନାଦନାଦାଂତତତ୍ତ୍ଵଂ
ନାଦାତୀତଂ ପ୍ରକୃତିରହିତଂ ରାମଚଂଦ୍ରଂ ଭଜେଽହମ୍ ॥ 55

ତାରାକାରଂ ନିଖିଲନିଲୟଂ ତତ୍ତ୍ଵମସ୍ୟାଦିଲକ୍ଷ୍ୟଂ
ଶବ୍ଦାଵାଚ୍ୟଂ ତ୍ରିଗୁଣରହିତଂ ଵ୍ୟୋମମଂଗୁଷ୍ଠମାତ୍ରମ୍ ।
ନିର୍ଵାଣାଖ୍ୟଂ ସଗୁଣମଗୁଣଵ୍ୟୋମରଂଧ୍ରାଂତରସ୍ଥଂ
ସୌଷୁମ୍ନାଂତଃ ପ୍ରଣଵସହିତଂ ରାମଚଂଦ୍ରଂ ଭଜେଽହମ୍ ॥ 56

ନିଜାନଂଦାକାରଂ ନିଗମତୁରଗାରାଧିତପଦଂ
ପରବ୍ରହ୍ମାନଂଦଂ ପରମପଦଗଂ ପାପହରଣମ୍ ।
କୃପାପାରାଵାରଂ ପରମପୁରୁଷଂ ପଦ୍ମନିଲୟଂ
ଭଜେ ରାମଂ ଶ୍ୟାମଂ ପ୍ରକୃତିରହିତଂ ନିର୍ଗୁଣମହମ୍ ॥ 57

ସାକେତେ ନଗରେ ସମସ୍ତମହିମାଧାରେ ଜଗନ୍ମୋହନେ
ରତ୍ନସ୍ତଂଭସହସ୍ରମଂଟପମହାସିଂହାସନେ ସାଂବୁଜେ ।
ଵିଶ୍ଵାମିତ୍ରଵସିଷ୍ଠଗୌତମଶୁକଵ୍ୟାସାଦିଭିର୍ମୌନିଭିଃ
ଧ୍ୟେୟଂ ଲକ୍ଷ୍ମଣଲୋକପାଲସହିତଂ ସୀତାସମେତଂ ଭଜେ ॥ 58

ରାମଂ ଶ୍ୟାମାଭିରାମଂ ରଵିଶଶିନୟନଂ କୋଟିସୂର୍ୟପ୍ରକାଶଂ
ଦିଵ୍ୟଂ ଦିଵ୍ୟାସ୍ତ୍ରପାଣିଂ ଶରମୁଖଶରଧିଂ ଚାରୁକୋଡଂଡହସ୍ତମ୍ ।
କାଲଂ କାଲାଗ୍ନିରୁଦ୍ରଂ ରିପୁକୁଲଦହନଂ ଵିଘ୍ନଵିଚ୍ଛେଦଦକ୍ଷଂ
ଭୀମଂ ଭୀମାଟ୍ଟହାସଂ ସକଲଭୟହରଂ ରାମଚଂଦ୍ରଂ ଭଜେଽହମ୍ ॥ 59

ଶ୍ରୀରାମଂ ଭୁଵନୈକସୁଂଦରତନୁଂ ଧାରାଧରଶ୍ୟାମଲଂ
ରାଜୀଵାୟତଲୋଚନଂ ରଘୁଵରଂ ରାକେଂଦୁବିଂବାନନମ୍ ।
କୋଦଂଡାଦିନିଜାୟୁଧାଶ୍ରିତଭୁଜୈର୍ଭ୍ରାଂତଂ ଵିଦେହାତ୍ମଜା-
ଧୀଶଂ ଭକ୍ତଜନାଵନଂ ରଘୁଵରଂ ଶ୍ରୀରାମଚଂଦ୍ରଂ ଭଜେ ॥ 60

ଶ୍ରୀଵତ୍ସାଂକମୁଦାରକୌସ୍ତୁଭଲସତ୍ପୀତାଂବରାଲଂକୃତଂ
ନାନାରତ୍ନଵିରାଜମାନମକୁଟଂ ନୀଲାଂବୁଦଶ୍ୟାମଲମ୍ ।
କସ୍ତୂରୀଘନସାରଚର୍ଚିତତନୁଂ ମଂଦାରମାଲାଧରଂ
କଂଦର୍ପାୟୁତସୁଂଦରଂ ରଘୁପତିଂ ସୀତାସମେତଂ ଭଜେ ॥ 61

ସଦାନଂଦଦେଵେ ସହସ୍ରାରପଦ୍ମେ
ଗଲଚ୍ଚଂଦ୍ରପୀୟୂଷଧାରାମୃତାଂତେ ।
ସ୍ଥିତଂ ରାମମୂର୍ତିଂ ନିଷେଵେ ନିଷେଵେ-
ଽନ୍ୟଦୈଵଂ ନ ସେଵେ ନ ସେଵେ ନ ସେଵେ ॥ 62

ସୁଧାଭାସିତଦ୍ଵୀପମଧ୍ୟେ ଵିମାନେ
ସୁପର୍ଵାଳିଵୃକ୍ଷୋଜ୍ଜ୍ଵଲେ ଶେଷତଲ୍ପେ ।
ନିଷଣ୍ଣଂ ରମାଂକଂ ନିଷେଵେ ନିଷେଵେ-
ଽନ୍ୟଦୈଵଂ ନ ସେଵେ ନ ସେଵେ ନ ସେଵେ ॥ 63

ଚିଦଂଶଂ ସମାନଂଦମାନଂଦକଂଦଂ
ସୁଷୁମ୍ନାଖ୍ୟରଂଧ୍ରାଂତରାଳେ ଚ ହଂସମ୍ ।
ସଚକ୍ରଂ ସଶଂଖଂ ସପୀତାଂବରାଂକଂ
ପରଂଚାନ୍ୟଦୈଵଂ ନ ଜାନେ ନ ଜାନେ ॥ 64

ଚତୁର୍ଵେଦକୂଟୋଲ୍ଲସତ୍କାରଣାଖ୍ୟଂ
ସ୍ଫୁରଦ୍ଦିଵ୍ୟଵୈମାନିକେ ଭୋଗିତଲ୍ପେ ।
ପରଂଧାମମୂର୍ତିଂ ନିଷଣ୍ଣଂ ନିଷେଵେ
ନିଷେଵେଽନ୍ୟଦୈଵଂ ନ ସେଵେ ନ ସେଵେ ॥ 65

ସିଂହାସନସ୍ଥଂ ସୁରସେଵିତଵ୍ୟଂ
ରତ୍ନାଂକିତାଲଂକୃତପାଦପଦ୍ମମ୍ ।
ସୀତାସମେତଂ ଶଶିସୂର୍ୟନେତ୍ରଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 66

ରାମଂ ପୁରାଣପୁରୁଷଂ ରମଣୀୟଵେଷଂ
ରାଜାଧିରାଜମକୁଟାର୍ଚିତପାଦପୀଠମ୍ ।
ସୀତାପତିଂ ସୁନୟନଂ ଜଗଦେକଵୀରଂ
ଶ୍ରୀରାମଚଂଦ୍ରମନିଶଂ କଲୟାମି ଚିତ୍ତେ ॥ 67

ପରାନଂଦଵସ୍ତୁସ୍ଵରୂପାଦିସାକ୍ଷିଂ
ପରବ୍ରହ୍ମଗମ୍ୟଂ ପରଂଜ୍ୟୋତିମୂର୍ତିମ୍ ।
ପରାଶକ୍ତିମିତ୍ରାଽପ୍ରିୟାରାଧିତାଂଘ୍ରିଂ
ପରଂଧାମରୂପଂ ଭଜେ ରାମଚଂଦ୍ରମ୍ ॥ 68

ମଂଦସ୍ମିତଂ କୁଂଡଲଗଂଡଭାଗଂ
ପୀତାଂବରଂ ଭୂଷଣଭୂଷିତାଂଗମ୍ ।
ନୀଲୋତ୍ପଲାଂଗଂ ଭୁଵନୈକମିତ୍ରଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 69

ଅଚିଂତ୍ୟମଵ୍ୟକ୍ତମନଂତରୂପ-
ମଦ୍ଵୈତମାନଂଦମନାଦିଗମ୍ୟମ୍ ।
ପୁଣ୍ୟସ୍ଵରୂପଂ ପୁରୁଷୋତ୍ତମାଖ୍ୟଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 70

ପଦ୍ମାସନସ୍ଥଂ ସୁରସେଵିତଵ୍ୟଂ
ପଦ୍ମାଲୟାନଂଦକଟାକ୍ଷଵୀକ୍ଷ୍ୟମ୍ ।
ଗଂଧର୍ଵଵିଦ୍ୟାଧରଗୀୟମାନଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 71

ଅନଂତକୀର୍ତିଂ ଵରଦଂ ପ୍ରସନ୍ନଂ
ପଦ୍ମାସନଂ ସେଵକପାରିଜାତମ୍ ।
ରାଜାଧିରାଜଂ ରଘୁଵୀରକେତୁଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 72

ସୁଗ୍ରୀଵମିତ୍ରଂ ସୁଜନାନୁରୂପଂ
ଲଂକାହରଂ ରାକ୍ଷସଵଂଶନାଶମ୍ ।
ଵେଦାଶ୍ରୟାଂଗଂ ଵିପୁଲାୟତାକ୍ଷଂ
ରାମଂ ଭଜେ ରାଘଵ ରାମଚଂଦ୍ରମ୍ ॥ 73

ସକୃତ୍ପ୍ରଣତରକ୍ଷାୟାଂ ସାକ୍ଷୀ ୟସ୍ୟ ଵିଭୀଷଣଃ ।
ସାପରାଧପ୍ରତୀକାରଃ ସ ଶ୍ରୀରାମୋ ଗତିର୍ମମ ॥ 74

ଫଲମୂଲାଶିନୌ ଦାଂତୌ ତାପସୌ ଧର୍ମଚାରିଣୌ ।
ରକ୍ଷଃକୁଲଵିହଂତାରୌ ଭ୍ରାତରୌ ରାମଲକ୍ଷ୍ମଣୌ ॥ 75

ତରୁଣୌ ରୂପସଂପନ୍ନୌ ସୁକୁମାରୌ ମହାବଲୌ ।
ପୁଂଡରୀକ ଵିଶାଲାକ୍ଷୌ ଚୀରକୃଷ୍ଣାଜିନାଂବରୌ ॥ 76

କୌସଲ୍ୟାନୟନେଂଦୁଂ ଦଶରଥମୁଖାରଵିଂଦମାର୍ତାଂଡମ୍ ।
ସୀତାମାନସହଂସଂ ରାମଂ ରାଜୀଵଲୋଚନଂ ଵଂଦେ ॥ 77

ଭର୍ଜନଂ ଭଵବୀଜାନାଂ ମାର୍ଜନଂ ସୁଖସଂପଦାମ୍ ।
ତର୍ଜନଂ ୟମଦୂତାନାଂ ରାମରାମେତି କୀର୍ତନମ୍ ॥ 78

ନ ଜାନେ ଜାନକୀ ଜାନେ ରାମ ତ୍ଵନ୍ନାମଵୈଭଵମ୍ ।
ସର୍ଵେଶୋ ଭଗଵାନ୍ ଶଂଭୁର୍ଵାଲ୍ମୀକିର୍ଵେତ୍ତି ଵା ନଵା ॥ 79

କରତଲଧୃତଚାପଂ କାଲମେଘସ୍ଵରୂପଂ
ସରସିଜଦଳନେତ୍ରଂ ଚାରୁହାସଂ ସୁଗାତ୍ରମ୍ ।
ଵିଚିନୁତଵନଵାସଂ ଵିକ୍ରମୋଦଗ୍ରଵେଷଂ
ପ୍ରଣମତ ରଘୁନାଥଂ ଜାନକୀପ୍ରାଣନାଥମ୍ ॥ 80

ଵିଦ୍ୟୁତ୍ସ୍ଫୁରନ୍ମକରକୁଂଡଲଦୀପ୍ତଚାରୁ-
ଗଂଡସ୍ଥଲଂ ମଣିକିରୀଟଵିରାଜମାନମ୍ ।
ପୀତାଂବରଂ ଜଲଦନୀଲମୁଦାରକାଂତିଂ
ଶ୍ରୀରାମଚଂଦ୍ରମନିଶଂ କଲୟାମି ଚିତ୍ତେ ॥ 81

ରତ୍ନୋଲ୍ଲସଜ୍ଜ୍ଵଲିତକୁଂଡଲଗଂଡଭାଗଂ
କସ୍ତୂରିକାତିଲକଶୋଭିତଫାଲଭାଗମ୍ ।
କର୍ଣାଂତଦୀର୍ଘନୟନଂ କରୁଣାକଟାକ୍ଷଂ
ଶ୍ରୀରାମଚଂଦ୍ର ମୁଖମାତ୍ମନି ସନ୍ନିଧତ୍ତମ୍ ॥ 82

ଵୈଦେହୀସହିତଂ ଚ ଲକ୍ଷ୍ମଣୟୁତଂ କୈକେୟିପୁତ୍ରାନ୍ଵିତଂ
ସୁଗ୍ରୀଵଂ ଚ ଵିଭୀଷଣାନିଲସୁତୌ ନୀଲଂ ନଲଂ ସାଂଗଦମ୍ ।
ଵିଶ୍ଵାମିତ୍ରଵସିଷ୍ଠଗୌତମଭରଦ୍ଵାଜାଦିକାନ୍ ମାନୟନ୍
ରାମୋ ମାରୁତିସେଵିତଃ ସ୍ମରତୁ ମାଂ ସାମ୍ରାଜ୍ୟସିଂହାସନେ ॥ 83

ସକଲଗୁଣନିଧାନଂ ୟୋଗିଭିସ୍ସ୍ତୂୟମାନଂ
ଭଜିତସୁରଵିମାନଂ ରକ୍ଷିତେଂଦ୍ରାଦିମାନମ୍ ।
ମହିତଵୃଷଭୟାନଂ ସୀତୟା ଶୋଭମାନଂ
ସ୍ମରତୁ ହୃଦୟଭାନୁଂ ବ୍ରହ୍ମରାମାଭିରାମମ୍ ॥ 84

ତ୍ରିଦଶକୁମୁଦଚଂଦ୍ରୋ ଦାନଵାଂଭୋଜଚଂଦ୍ରୋ
ଦୁରିତତିମିରଚଂଦ୍ରୋ ୟୋଗିନାଂ ଜ୍ଞାନଚଂଦ୍ରଃ ।
ପ୍ରଣତନୟନଚଂଦ୍ରୋ ମୈଥିଲୀନେତ୍ରଚଂଦ୍ରୋ
ଦଶମୁଖରିପୁଚଂଦ୍ରଃ ପାତୁ ମାଂ ରାମଚଂଦ୍ରଃ ॥ 85

ୟନ୍ନାମୈଵ ସହସ୍ରନାମସଦୃଶଂ ୟନ୍ନାମ ଵେଦୈସ୍ସମଂ
ୟନ୍ନାମାଂକିତଵାକ୍ୟ-ମାସୁରବଲସ୍ତ୍ରୀଗର୍ଭଵିଚ୍ଛେଦନମ୍ ।
ୟନ୍ନାମ ଶ୍ଵପଚାର୍ୟଭେଦରହିତଂ ମୁକ୍ତିପ୍ରଦାନୋଜ୍ଜ୍ଵଲଂ
ତନ୍ନାମାଽଲଘୁରାମରାମରମଣଂ ଶ୍ରୀରାମନାମାମୃତମ୍ ॥ 86

ରାଜୀଵନେତ୍ର ରଘୁପୁଂଗଵ ରାମଭଦ୍ର
ରାକେଂଦୁବିଂବସଦୃଶାନନ ନୀଲଗାତ୍ର ।
ରାମାଽଭିରାମ ରଘୁଵଂଶସମୁଦ୍ଭଵ ତ୍ଵଂ
ଶ୍ରୀରାମଚଂଦ୍ର ମମ ଦେହି କରାଵଲଂବମ୍ ॥ 87

ମାଣିକ୍ୟମଂଜୀରପଦାରଵିଂଦଂ
ରାମାର୍କସଂଫୁଲ୍ଲମୁଖାରଵିଂଦମ୍ ।
ଭକ୍ତାଭୟପ୍ରାପିକରାରଵିଂଦାଂ
ଦେଵୀଂ ଭଜେ ରାଘଵଵଲ୍ଲଭାଂ ତାମ୍ ॥ 88

ଜୟତୁ ଵିଜୟକାରୀ ଜାନକୀମୋଦକାରୀ
ତପନକୁଲଵିହାରୀ ଦଂଡକାରଣ୍ୟଚାରୀ ।
ଦଶଵଦନକୁଠାରୀ ଦୈତ୍ୟଵିଚ୍ଛେଦକାରୀ
ମଣିମକୁଟକଧାରୀ ଚଂଡକୋଦଂଡଧାରୀ ॥ 89

ରାମଃ ପିତା ରଘଵ ଏଵ ମାତା
ରାମସ୍ସୁବଂଧୁଶ୍ଚ ସଖା ହିତଶ୍ଚ ।
ରାମୋ ଗୁରୁର୍ମେ ପରମଂ ଚ ଦୈଵଂ
ରାମଂ ଵିନା ନାଽନ୍ୟମହଂ ସ୍ମରାମି ॥ 90

ଶ୍ରୀରାମ ମେ ତ୍ଵଂ ହି ପିତା ଚ ମାତା
ଶ୍ରୀରାମ ମେ ତ୍ଵଂ ହି ସୁହୃଚ୍ଚ ବଂଧୁଃ ।
ଶ୍ରୀରାମ ମେ ତ୍ଵଂ ହି ଗୁରୁଶ୍ଚ ଗୋଷ୍ଠୀ
ଶ୍ରୀରାମ ମେ ତ୍ଵଂ ହି ସମସ୍ତମେଵ ॥ 91

ରାମଚଂଦ୍ରଚରିତାମୃତପାନଂ
ସୋମପାନଶତକୋଟିସମାନମ୍ ।
ସୋମପାନଶତକୋଟିଭିରୀୟା-
ଜ୍ଜନ୍ମ ନୈତି ରଘୁନାୟକନାମ୍ନା ॥ 92

ରାମ ରାମ ଦୟାସିଂଧୋ ରାଵଣାରେ ଜଗତ୍ପତେ ।
ତ୍ଵତ୍ପାଦକମଲାସକ୍ତି-ର୍ଭଵେଜ୍ଜନ୍ମନି ଜନ୍ମନି ॥ 93

ଶ୍ରୀରାମଚଂଦ୍ରେତି ଦୟାପରେତି
ଭକ୍ତପ୍ରିୟେତି ଭଵବଂଧନମୋଚନେତି ।
ନାଥେତି ନାଗଶୟନେତି ସଦା ସ୍ତୁଵଂତଂ
ମାଂ ପାହି ଭୀତମନିଶଂ କୃପଣଂ କୃପାଳୋ ॥ 94

ଅୟୋଧ୍ୟାନାଥ ରାଜେଂଦ୍ର ସୀତାକାଂତ ଜଗତ୍ପତେ ।
ଶ୍ରୀରାମ ପୁଂଡରୀକାକ୍ଷ ରାମଚଂଦ୍ର ନମୋଽସ୍ତୁ ତେ ॥ 95

ହେ ରାମ ହେ ରମଣ ହେ ଜଗଦେକଵୀର
ହେ ନାଥ ହେ ରଘୁପତେ କରୁଣାଲଵାଲ ।
ହେ ଜାନକୀରମଣ ହେ ଜଗଦେକବଂଧୋ
ମାଂ ପାହି ଦୀନମନିଶଂ କୃପଣଂ କୃତଘ୍ନମ୍ ॥ 96

ଜାନାତି ରାମ ତଵ ତତ୍ତ୍ଵଗତିଂ ହନୂମାନ୍ ।
ଜାନାତି ରାମ ତଵ ସଖ୍ୟଗତିଂ କପୀଶଃ ।
ଜାନାତି ରାମ ତଵ ୟୁଦ୍ଧଗତିଂ ଦଶାସ୍ୟୋ ।
ଜାନାତି ରାମ ଧନଦାନୁଜ ଏଵ ସତ୍ୟମ୍ ॥ 97

ସେଵ୍ୟଂ ଶ୍ରୀରାମମଂତ୍ରଂ ଶ୍ରଵଣଶୁଭକରଂ ଶ୍ରେଷ୍ଠସୁଜ୍ଞାନିମଂତ୍ରଂ
ସ୍ତଵ୍ୟଂ ଶ୍ରୀରାମମଂତ୍ରଂ ନରକଦୁରିତଦୁର୍ଵାରନିର୍ଘାତମଂତ୍ରମ୍ ।
ଭଵ୍ୟଂ ଶ୍ରୀରାମମଂତ୍ରଂ ଭଜତୁ ଭଜତୁ ସଂସାରନିସ୍ତାରମଂତ୍ରଂ
ଦିଵ୍ୟଂ ଶ୍ରୀରାମମଂତ୍ରଂ ଦିଵି ଭୁଵି ଵିଲସନ୍ମୋକ୍ଷରକ୍ଷୈକମଂତ୍ରମ୍ ॥ 98

ନିଖିଲନିଲୟମଂତ୍ରଂ ନିତ୍ୟତତ୍ତ୍ଵାଖ୍ୟମଂତ୍ରଂ
ଭଵକୁଲହରମଂତ୍ରଂ ଭୂମିଜାପ୍ରାଣମଂତ୍ରମ୍ ।
ପଵନଜନୁତମଂତ୍ରଂ ପାର୍ଵତୀମୋକ୍ଷମଂତ୍ରଂ
ପଶୁପତିନିଜମଂତ୍ରଂ ପାତୁ ମାଂ ରାମମଂତ୍ରମ୍ ॥ 99

ପ୍ରଣଵନିଲୟମଂତ୍ରଂ ପ୍ରାଣନିର୍ଵାଣମଂତ୍ରଂ
ପ୍ରକୃତିପୁରୁଷମଂତ୍ରଂ ବ୍ରହ୍ମରୁଦ୍ରେଂଦ୍ରମଂତ୍ରମ୍ ।
ପ୍ରକଟଦୁରିତରାଗଦ୍ଵେଷନିର୍ଣାଶମଂତ୍ରଂ
ରଘୁପତିନିଜମଂତ୍ରଂ ରାମରାମେତିମଂତ୍ରମ୍ ॥ 100

ଦଶରଥସୁତମଂତ୍ରଂ ଦୈତ୍ୟସଂହାରମଂତ୍ରଂ
ଵିବୁଧଵିନୁତମଂତ୍ରଂ ଵିଶ୍ଵଵିଖ୍ୟାତମଂତ୍ରମ୍ ।
ମୁନିଗଣନୁତମଂତ୍ରଂ ମୁକ୍ତିମାର୍ଗୈକମଂତ୍ରଂ
ରଘୁପତିନିଜମଂତ୍ରଂ ରାମରାମେତିମଂତ୍ରମ୍ ॥ 101

ସଂସାରସାଗରଭୟାପହଵିଶ୍ଵମଂତ୍ରଂ
ସାକ୍ଷାନ୍ମୁମୁକ୍ଷୁଜନସେଵିତସିଦ୍ଧମଂତ୍ରମ୍ ।
ସାରଂଗହସ୍ତମୁଖହସ୍ତନିଵାସମଂତ୍ରଂ
କୈଵଲ୍ୟମଂତ୍ରମନିଶଂ ଭଜ ରାମମଂତ୍ରମ୍ ॥ 102

ଜୟତୁ ଜୟତୁ ମଂତ୍ରଂ ଜନ୍ମସାଫଲ୍ୟମଂତ୍ରଂ
ଜନନମରଣଭେଦକ୍ଲେଶଵିଚ୍ଛେଦମଂତ୍ରମ୍ ।
ସକଲନିଗମମଂତ୍ରଂ ସର୍ଵଶାସ୍ତ୍ରୈକମଂତ୍ରଂ
ରଘୁପତିନିଜମଂତ୍ରଂ ରାମରାମେତିମଂତ୍ରମ୍ ॥ 103

ଜଗତି ଵିଶଦମଂତ୍ରଂ ଜାନକୀପ୍ରାଣମଂତ୍ରଂ
ଵିବୁଧଵିନୁତମଂତ୍ରଂ ଵିଶ୍ଵଵିଖ୍ୟାତମଂତ୍ରମ୍ ।
ଦଶରଥସୁତମଂତ୍ରଂ ଦୈତ୍ୟସଂହାରମଂତ୍ରଂ
ରଘୁପତିନିଜମଂତ୍ରଂ ରାମରାମେତିମଂତ୍ରମ୍ ॥ 104

ବ୍ରହ୍ମାଦିୟୋଗିମୁନିପୂଜିତସିଦ୍ଧମଂତ୍ରଂ
ଦାରିଦ୍ର୍ୟଦୁଃଖଭଵରୋଗଵିନାଶମଂତ୍ରମ୍ ।
ସଂସାରସାଗରସମୁତ୍ତରଣୈକମଂତ୍ରଂ
ଵଂଦେ ମହାଭୟହରଂ ରଘୁରାମମଂତ୍ରମ୍ ॥ 105

ଶତ୍ରୁଚ୍ଛେଦୈକମଂତ୍ରଂ ସରସମୁପନିଷଦ୍ଵାକ୍ୟସଂପୂଜ୍ୟମଂତ୍ରଂ
ସଂସାରୋତ୍ତାରମଂତ୍ରଂ ସମୁଚିତସମୟେ ସଂଗନିର୍ୟାଣମଂତ୍ରମ୍ ।
ସର୍ଵୈଶ୍ଵର୍ୟୈକମଂତ୍ରଂ ଵ୍ୟସନଭୁଜଗସଂଦଷ୍ଟସଂତ୍ରାଣମଂତ୍ରଂ
ଜିହ୍ଵେ ଶ୍ରୀରାମମଂତ୍ରଂ ଜପ ଜପ ସଫଲଂ ଜନ୍ମସାଫଲ୍ୟମଂତ୍ରମ୍ ॥ 106

ନିତ୍ୟଂ ଶ୍ରୀରାମମଂତ୍ରଂ ନିରୁପମମଧିକଂ ନୀତିସୁଜ୍ଞାନମଂତ୍ରଂ
ସତ୍ୟଂ ଶ୍ରୀରାମମଂତ୍ରଂ ସଦମଲହୃଦୟେ ସର୍ଵଦାରୋଗ୍ୟମଂତ୍ରମ୍ ।
ସ୍ତୁତ୍ୟଂ ଶ୍ରୀରାମମଂତ୍ରଂ ସୁଲଲିତସୁମନସ୍ସୌଖ୍ୟସୌଭାଗ୍ୟମଂତ୍ରଂ
ପଠ୍ୟଂ ଶ୍ରୀରାମମଂତ୍ରଂ ପଵନଜଵରଦଂ ପାତୁ ମାଂ ରାମମଂତ୍ରମ୍ ॥ 107

ଵ୍ୟାମୋହପ୍ରଶମୌଷଧଂ ମୁନିମନୋଵୃତ୍ତିପ୍ରଵୃତ୍ତ୍ୟୌଷଧଂ
ଦୈତ୍ୟୋନ୍ମୂଲକରୌଷଧଂ ଭଵଭୟପ୍ରଧ୍ଵଂସନୈକୌଷଧମ୍ ।
ଭକ୍ତାନଂଦକରୌଷଧଂ ତ୍ରିଭୁଵନେ ସଂଜୀଵନୈକୌଷଧଂ
ଶ୍ରେୟଃ ପ୍ରାପ୍ତିକରୌଷଧଂ ପିବ ମନଃ ଶ୍ରୀରାମନାମୌଷଧମ୍ ॥ 108

ସକଲଭୁଵନରତ୍ନଂ ସର୍ଵଶାସ୍ତ୍ରାର୍ଥରତ୍ନଂ
ସମରଵିଜୟରତ୍ନଂ ସଚ୍ଚିଦାନଂଦରତ୍ନମ୍ ।
ଦଶମୁଖହରରତ୍ନଂ ଦାନଵାରାତିରତ୍ନଂ
ରଘୁକୁଲନୃପରତ୍ନଂ ପାତୁ ମାଂ ରାମରତ୍ନମ୍ ॥ 109

ସକଲଭୁଵନରତ୍ନଂ ସଚ୍ଚିଦାନଂଦରତ୍ନଂ
ସକଲହୃଦୟରତ୍ନଂ ସୂର୍ୟବିଂବାଂତରତ୍ନମ୍ ।
ଵିମଲସୁକୃତରତ୍ନଂ ଵେଦଵେଦାଂତରତ୍ନଂ
ପୁରହରଜପରତ୍ନଂ ପାତୁ ମାଂ ରାମରତ୍ନମ୍ ॥ 110

ନିଗମଶିଖରରତ୍ନଂ ନିର୍ମଲାନଂଦରତ୍ନଂ
ନିରୁପମଗୁଣରତ୍ନଂ ନାଦନାଦାଂତରତ୍ନମ୍ ।
ଦଶରଥକୁଲରତ୍ନଂ ଦ୍ଵାଦଶାଂତସ୍ସ୍ଥରତ୍ନଂ
ପଶୁପତିଜପରତ୍ନଂ ପାତୁ ମାଂ ରାମରତ୍ନମ୍ ॥ 111

ଶତମଖସୁତରତ୍ନଂ ଷୋଡଶାଂତସ୍ସ୍ଥରତ୍ନଂ
ମୁନିଜନଜପରତ୍ନଂ ମୁଖ୍ୟଵୈକୁଂଠରତ୍ନମ୍ ।
ନିରୁପମଗୁଣରତ୍ନଂ ନୀରଜାଂତସ୍ସ୍ଥରତ୍ନଂ
ପରମପଦଵିରତ୍ନଂ ପାତୁ ମାଂ ରାମରତ୍ନମ୍ ॥ 112

ସକଲସୁକୃତରତ୍ନଂ ସତ୍ୟଵାକ୍ୟାର୍ଥରତ୍ନଂ
ଶମଦମଗୁଣରତ୍ନଂ ଶାଶ୍ଵତାନଂଦରତ୍ନମ୍ ।
ପ୍ରଣୟନିଲୟରତ୍ନଂ ପ୍ରସ୍ଫୁଟଦ୍ୟୋତିରତ୍ନଂ
ପରମପଦଵିରତ୍ନଂ ପାତୁ ମାଂ ରାମରତ୍ନମ୍ ॥ 113

ନିଗମଶିଖରରତ୍ନଂ ନିତ୍ୟମାଶାସ୍ୟରତ୍ନଂ
ଜନନୁତନୃପରତ୍ନଂ ଜାନକୀରୂପରତ୍ନମ୍ ।
ଭୁଵନଵଲୟରତ୍ନଂ ଭୂଭୁଜାମେକରତ୍ନଂ
ରଘୁକୁଲଵରରତ୍ନଂ ପାତୁ ମାଂ ରାମରତ୍ନମ୍ ॥ 114

ଵିଶାଲନେତ୍ରଂ ପରିପୂର୍ଣଗାତ୍ରଂ
ସୀତାକଲତ୍ରଂ ସୁରଵୈରିଜୈତ୍ରମ୍ ।
କାରୁଣ୍ୟପାତ୍ରଂ ଜଗତଃ ପଵିତ୍ରଂ
ଶ୍ରୀରାମରତ୍ନଂ ପ୍ରଣତୋଽସ୍ମି ନିତ୍ୟମ୍ ॥ 115

ହେ ଗୋପାଲକ ହେ ଦୟାଜଲନିଧେ ହେ ସଦ୍ଗୁଣାଂଭୋନିଧେ
ହେ ଦୈତ୍ୟାଂତକ ହେ ଵିଭୀଷଣଦୟାପରୀଣ ହେ ଭୂପତେ ।
ହେ ଵୈଦେହସୁତାମନୋଜଵିହୃତେ ହେ କୋଟିମାରାକୃତେ
ହେ ନଵ୍ୟାଂବୁଜନେତ୍ର ପାଲୟ ପରଂ ଜାନାମି ନ ତ୍ଵାଂ ଵିନା ॥ 116

ୟସ୍ୟ କିଂଚିଦପି ନୋ ହରଣୀୟଂ
କର୍ମ କିଂଚିଦପି ନୋ ଚରଣୀୟମ୍ ।
ରାମନାମ ଚ ସଦା ସ୍ମରଣୀୟଂ
ଲୀଲୟା ଭଵଜଲଂ ତରଣୀୟମ୍ ॥ 117

ଦଶରଥସୁତମୀଶଂ ଦଂଡକାରଣ୍ୟଵାସଂ
ଶତମଖମଣିନୀଲଂ ଜାନକୀପ୍ରାଣଲୋଲମ୍ ।
ସକଲଭୁଵନମୋହଂ ସନ୍ନୁତାଂଭୋଦଦେହଂ
ବହୁଳନୁତସମୁଦ୍ରଂ ଭାଵୟେ ରାମଭଦ୍ରମ୍ ॥ 118

ଵିଶାଲନେତ୍ରଂ ପରିପୂର୍ଣଗାତ୍ରଂ
ସୀତାକଳତ୍ରଂ ସୁରଵୈରିଜୈତ୍ରମ୍ ।
ଜଗତ୍ପଵିତ୍ରଂ ପରମାତ୍ମତଂତ୍ରଂ
ଶ୍ରୀରାମଚଂଦ୍ରଂ ପ୍ରଣମାମି ଚିତ୍ତେ ॥ 119

ଜୟ ଜୟ ରଘୁରାମ ଶ୍ରୀମୁଖାଂଭୋଜଭାନୋ
ଜୟ ଜୟ ରଘୁଵୀର ଶ୍ରୀମଦଂଭୋଜନେତ୍ର ।
ଜୟ ଜୟ ରଘୁନାଥ ଶ୍ରୀକରାଭ୍ୟର୍ଚିତାଂଘ୍ରି
ଜୟ ଜୟ ରଘୁଵର୍ୟ ଶ୍ରୀଶ କାରୁଣ୍ୟସିଂଧୋ ॥ 120

ମଂଦାରମୂଲେ ମଣିପୀଠସଂସ୍ଥଂ
ସୁଧାପ୍ଲୁତଂ ଦିଵ୍ୟଵିରାଟ୍ସ୍ଵରୂପମ୍ ।
ସବିଂଦୁନାଦାଂତକଲାଂତତୁର୍ୟ-
ମୂର୍ତିଂ ଭଜେଽହଂ ରଘୁଵଂଶରତ୍ନମ୍ ॥ 121

ନାଦଂ ନାଦଵିନୀଲଚିତ୍ତପଵନଂ ନାଦାଂତତ୍ତ୍ଵପ୍ରିୟଂ
ନାମାକାରଵିଵର୍ଜିତଂ ନଵଘନଶ୍ୟାମାଂଗନାଦପ୍ରିୟମ୍ ।
ନାଦାଂଭୋଜମରଂଦମତ୍ତଵିଲସଦ୍ଭୃଂଗଂ ମଦାଂତସ୍ସ୍ଥିତଂ
ନାଦାଂତଧୃଵମଂଡଲାବ୍ଜରୁଚିରଂ ରାମଂ ଭଜେ ତାରକମ୍ ॥ 122

ନାନାଭୂତହୃଦବ୍ଜପଦ୍ମନିଲୟଂ ନାମୋଜ୍ଜ୍ଵଲାଭୂଷଣମ୍ ।
ନାମସ୍ତୋତ୍ରପଵିତ୍ରିତତ୍ରିଭୁଵନଂ ନାରାୟଣାଷ୍ଟାକ୍ଷରମ୍ ।
ନାଦାଂତେଂଦୁଗଳତ୍ସୁଧାପ୍ଲୁତତନୁଂ ନାନାତ୍ମଚିନ୍ମାତ୍ରକମ୍ ।
ନାନାକୋଟିୟୁଗାଂତଭାନୁସଦୃଶଂ ରାମଂ ଭଜେ ତାରକମ୍ ॥ 123

ଵେଦ୍ୟଂ ଵେଦଗୁରୁଂ ଵିରିଂଚିଜନକଂ ଵେଦାଂତମୂର୍ତିଂ ସ୍ଫୁର-
ଦ୍ଵେଦଂ ଵେଦକଲାପମୂଲମହିମାଧାରାଂତକଂଦାଂକୁରମ୍ ।
ଵେଦଶୃଂଗସମାନଶେଷଶୟନଂ ଵେଦାଂତଵେଦ୍ୟାତ୍ମକଂ
ଵେଦାରାଧିତପାଦପଂକଜମହଂ ରାମଂ ଭଜେ ତାରକମ୍ ॥ 124

ମଜ୍ଜୀଵଂ ମଦନୁଗ୍ରହଂ ମଦଧିପଂ ମଦ୍ଭାଵନଂ ମତ୍ସୁଖଂ
ମତ୍ତାତଂ ମମ ସଦ୍ଗୁରୁଂ ମମ ଵରଂ ମୋହାଂଧଵିଚ୍ଛେଦନମ୍ ।
ମତ୍ପୁଣ୍ୟଂ ମଦନେକବାଂଧଵଜନଂ ମଜ୍ଜୀଵନଂ ମନ୍ନିଧିଂ
ମତ୍ସିଦ୍ଧିଂ ମମ ସର୍ଵକର୍ମସୁକୃତଂ ରାମଂ ଭଜେ ତାରକମ୍ ॥ 125

ନିତ୍ୟଂ ନୀରଜଲୋଚନଂ ନିରୁପମଂ ନୀଵାରଶୂକୋପମଂ
ନିର୍ଭେଦାନୁଭଵଂ ନିରଂତରଗୁଣଂ ନୀଲାଂଗରାଗୋଜ୍ଜ୍ଵଲମ୍ ।
ନିଷ୍ପାପଂ ନିଗମାଗମାର୍ଚିତପଦଂ ନିତ୍ୟାତ୍ମକଂ ନିର୍ମଲଂ
ନିଷ୍ପୁଣ୍ୟଂ ନିଖିଲଂ ନିରଂଜନପଦଂ ରାମଂ ଭଜେ ତାରକମ୍ ॥ 126

ଧ୍ୟାୟେ ତ୍ଵାଂ ହୃଦୟାଂବୁଜେ ରଘୁପତିଂ ଵିଜ୍ଞାନଦୀପାଂକୁରଂ
ହଂସୋହଂସପରଂପରାଦିମହିମାଧାରଂ ଜଗନ୍ମୋହନମ୍ ।
ହସ୍ତାଂଭୋଜଗଦାବ୍ଜଚକ୍ରମତୁଲଂ ପୀତାଂବରଂ କୌସ୍ତୁଭଂ
ଶ୍ରୀଵତ୍ସଂ ପୁରୁଷୋତ୍ତମଂ ମଣିନିଭଂ ରାମଂ ଭଜେ ତାରକମ୍ ॥ 127

ସତ୍ୟଜ୍ଞାନମନଂତମଚ୍ୟୁତମଜଂ ଚାଵ୍ୟାକୃତଂ ତତ୍ପରଂ
କୂଟସ୍ଥାଦିସମସ୍ତସାକ୍ଷିମନଘଂ ସାକ୍ଷାଦ୍ଵିରାଟ୍ତତ୍ତ୍ଵଦମ୍ ।
ଵେଦ୍ୟଂ ଵିଶ୍ଵମୟଂ ସ୍ଵଲୀନଭୁଵନସ୍ଵାରାଜ୍ୟସୌଖ୍ୟପ୍ରଦଂ
ପୂର୍ଣଂ ପୂର୍ଣତରଂ ପୁରାଣପୁରୁଷଂ ରାମଂ ଭଜେ ତାରକମ୍ ॥ 128

ରାମଂ ରାକ୍ଷସଵଂଶନାଶନକରଂ ରାକେଂଦୁବିଂବାନନଂ
ରକ୍ଷୋରିଂ ରଘୁଵଂଶଵର୍ଧନକରଂ ରକ୍ତାଧରଂ ରାଘଵମ୍ ।
ରାଧାୟାତ୍ମନିଵାସିନଂ ରଵିନିଭଂ ରମ୍ୟଂ ରମାନାୟକଂ
ରଂଧ୍ରାଂତର୍ଗତଶେଷଶାୟିନମହଂ ରାମଂ ଭଜେ ତାରକମ୍ ॥ 129

ଓତପ୍ରୋତସମସ୍ତଵସ୍ତୁନିଚୟଂ ଓଂକାରବୀଜାକ୍ଷରଂ
ଓଂକାରପ୍ରକୃତିଂ ଷଡକ୍ଷରହିତଂ ଓଂକାରକଂଦାଂକୁରମ୍ ।
ଓଂକାରସ୍ଫୁଟଭୂର୍ଭୁଵସ୍ସୁପରିତଂ ଓଘତ୍ରୟାରାଧିତମ୍
ଓଂକାରୋଜ୍ଜ୍ଵଲସିଂହପୀଠନିଲୟଂ ରାମଂ ଭଜେ ତାରକମ୍ ॥ 130

ସାକେତେ ନଗରେ ସମସ୍ତସୁଖଦେ ହର୍ମ୍ୟେଽବ୍ଜକୋଟିଦ୍ୟୁତେ
ନକ୍ଷତ୍ରଗ୍ରହପଂକ୍ତିଲଗ୍ନଶିଖରେ ଚାଂତର୍ୟପଂକେରୁହେ ।
ଵାଲ୍ମୀକାତ୍ରିପରାଶରାଦିମୁନିଭିସ୍ସଂସେଵ୍ୟମାନଂ ସ୍ଥିତଂ
ସୀତାଲଂକୃତଵାମଭାଗମନିଶଂ ରାମଂ ଭଜେ ତାରକମ୍ ॥ 131

ଵୈକୁଂଠେ ନଗରେ ସୁରଦ୍ରୁମତଲେ ଚାନଂଦଵପ୍ରାଂତରେ
ନାନାରତ୍ନଵିନିର୍ମିତସ୍ଫୁଟପଟୁପ୍ରାକାରସଂଵେଷ୍ଟିତେ ।
ସୌଧେଂଦୂପଲଶେଷତଲ୍ପଲଲିତେ ନୀଲୋତ୍ପଲଚ୍ଛାଦିତେ
ପର୍ୟଂକେ ଶୟନଂ ରମାଦିସହିତଂ ରାମଂ ଭଜେ ତାରକମ୍ ॥ 132

ଵଂଦେ ରାମମନାଦିପୂରୁଷମଜଂ ଵଂଦେ ରମାନାୟକଂ
ଵଂଦେ ହାରିକିରୀଟକୁଂଡଲଧରଂ ଵଂଦେ ସୁନୀଲଦ୍ୟୁତିମ୍ ।
ଵଂଦେ ଚାପକଲଂବକୋଜ୍ଜ୍ଵଲକରଂ ଵଂଦେ ଜଗନ୍ମଂଗଳଂ
ଵଂଦେ ପଂକ୍ତିରଥାତ୍ମଜଂ ମମ ଗୁରୁଂ ଵଂଦେ ସଦା ରାଘଵମ୍ ॥ 133

ଵଂଦେ ଶୌନକଗୌତମାଦ୍ୟଭିନୁତଂ ଵଂଦେ ଘନଶ୍ୟାମଲଂ
ଵଂଦେ ତାରକପୀଠମଧ୍ୟନିଲୟଂ ଵଂଦେ ଜଗନ୍ନାୟକମ୍ ।
ଵଂଦେ ଭକ୍ତଜନୌଘଦେଵିଵଟପଂ ଵଂଦେ ଧନୁର୍ଵଲ୍ଲଭଂ
ଵଂଦେ ତତ୍ତ୍ଵମସୀତିଵାକ୍ୟଜନକଂ ଵଂଦେ ସଦା ରାଘଵମ୍ ॥ 134

ଵଂଦେ ସୂର୍ୟଶଶାଂକଲୋଚନୟୁଗଂ ଵଂଦେ ଜଗତ୍ପାଵନଂ
ଵଂଦେ ପତ୍ରସହସ୍ରପଦ୍ମନିଲୟଂ ଵଂଦେ ପୁରାରିପ୍ରିୟମ୍ ।
ଵଂଦେ ରାକ୍ଷସଵଂଶନାଶନକରଂ ଵଂଦେ ସୁଧାଶୀତଲଂ
ଵଂଦେ ଦେଵକପୀଂଦ୍ରକୋଟିଵିନୁତଂ ଵଂଦେ ସଦା ରାଘଵମ୍ ॥ 135

ଵଂଦେ ସାଗରଗର୍ଵଭଂଗଵିଶିଖଂ ଵଂଦେ ଜଗଜ୍ଜୀଵନଂ
ଵଂଦେ କୌଶିକୟାଗରକ୍ଷଣକରଂ ଵଂଦେ ଗୁରୁଣାଂ ଗୁରୁମ୍ ।
ଵଂଦେ ବାଣଶରାସନୋଜ୍ଜ୍ଵଲକରଂ ଵଂଦେ ଜଟାଵଲ୍କଲଂ
ଵଂଦେ ଲକ୍ଷ୍ମଣଭୂମିଜାନ୍ଵିତମହଂ ଵଂଦେ ସଦା ରାଘଵମ୍ ॥ 136

ଵଂଦେ ପାଂଡରପୁଂଡରୀକନୟନଂ ଵଂଦେଽବ୍ଜବିଂବାନନଂ
ଵଂଦେ କଂବୁଗଳଂ କରାବ୍ଜୟୁଗଳଂ ଵଂଦେ ଲଲାଟୋଜ୍ଜ୍ଵଲମ୍ ।
ଵଂଦେ ପୀତଦୁକୂଲମଂବୁଦନିଭଂ ଵଂଦେ ଜଗନ୍ମୋହନଂ
ଵଂଦେ କାରଣମାନୁଷୋଜ୍ଜ୍ଵଲତନୁଂ ଵଂଦେ ସଦା ରାଘଵମ୍ ॥ 137

ଵଂଦେ ନୀଲସରୋଜକୋମଲରୁଚିଂ ଵଂଦେ ଜଗଦ୍ଵଂଦିତଂ
ଵଂଦେ ସୂର୍ୟକୁଲାବ୍ଧିକୌସ୍ତୁଭମଣିଂ ଵଂଦେ ସୁରାରାଧିତମ୍ ।
ଵଂଦେ ପାତକପଂଚକପ୍ରହରଣଂ ଵଂଦେ ଜଗତ୍କାରଣଂ
ଵଂଦେ ଵିଂଶତିପଂଚତତ୍ତ୍ଵରହିତଂ ଵଂଦେ ସଦା ରାଘଵମ୍ ॥ 138

ଵଂଦେ ସାଧକଵର୍ଗକଲ୍ପକତରୁଂ ଵଂଦେ ତ୍ରିମୂର୍ତ୍ୟାତ୍ମକଂ
ଵଂଦେ ନାଦଲୟାଂତରସ୍ଥଲଗତଂ ଵଂଦେ ତ୍ରିଵର୍ଗାତ୍ମକମ୍ ।
ଵଂଦେ ରାଗଵିହୀନଚିତ୍ତସୁଲଭଂ ଵଂଦେ ସଭାନାୟକଂ
ଵଂଦେ ପୂର୍ଣଦୟାମୃତାର୍ଣଵମହଂ ଵଂଦେ ସଦା ରାଘଵମ୍ ॥ 139

ଵଂଦେ ସାତ୍ତ୍ଵିକତତ୍ତ୍ଵମୁଦ୍ରିତତନୁଂ ଵଂଦେ ସୁଧାଦାୟକଂ
ଵଂଦେ ଚାରୁଚତୁର୍ଭୁଜଂ ମଣିନିଭଂ ଵଂଦେ ଷଡବ୍ଜସ୍ଥିତମ୍ ।
ଵଂଦେ ବ୍ରହ୍ମପିପୀଲିକାଦିନିଲୟଂ ଵଂଦେ ଵିରାଟ୍ଵିଗ୍ରହଂ
ଵଂଦେ ପନ୍ନଗତଲ୍ପଶାୟିନମହଂ ଵଂଦେ ସଦା ରାଘଵମ୍ ॥ 140

ସିଂହାସନସ୍ଥଂ ମୁନିସିଦ୍ଧସେଵ୍ୟଂ
ରକ୍ତୋତ୍ପଲାଲଂକୃତପାଦପଦ୍ମମ୍ ।
ସୀତାସମେତଂ ଶଶିସୂର୍ୟନେତ୍ରଂ
ରାମଂ ଭଜେ ରାଘଵରାମଚଂଦ୍ରମ୍ ॥ 141

ଶ୍ରୀରାମଭଦ୍ରାଶ୍ରିତସଦ୍ଗୁରୂଣାଂ
ପାଦାରଵିଂଦଂ ଭଜତାଂ ନରାଣାମ୍ ।
ଆରୋଗ୍ୟମୈଶ୍ଵର୍ୟମନଂତକୀର୍ତି-
ରଂତେ ଚ ଵିଷ୍ଣୋଃ ପଦମସ୍ତି ସତ୍ୟମ୍ ॥ 142

ଦଶରଥଵରପୁତ୍ରଂ ଜାନକୀସତ୍କଳତ୍ରଂ
ଦଶମୁଖହରଦକ୍ଷଂ ପଦ୍ମପତ୍ରାୟତାକ୍ଷମ୍ ।
କରଧୃତଶରଚାପଂ ଚାରୁମୁକ୍ତାକଲାପଂ
ରଘୁକୁଲନୃଵରେଣ୍ୟଂ ରାମମୀଡେ ଶରଣ୍ୟମ୍ ॥ 143

ଦଶମୁଖଗଜସିଂହଂ ଦୈତ୍ୟଗର୍ଵାତିରଂହଂ
କଦନଭୟଦହସ୍ତଂ ତାରକବ୍ରହ୍ମ ଶସ୍ତମ୍ ।
ମଣିଖଚିତକିରୀଟଂ ମଂଜୁଲାଲାପଵାଟଂ
ଦଶରଥକୁଲଚଂଦ୍ରଂ ରାମଚଂଦ୍ରଂ ଭଜେଽହମ୍ ॥ 144

ରାମଂ ରକ୍ତସରୋରୁହାକ୍ଷମମଲଂ ଲଂକାଧିନାଥାଂତକଂ
କୌସଲ୍ୟାନୟନୋତ୍ସୁକଂ ରଘୁଵରଂ ନାଗେଂଦ୍ରତଲ୍ପସ୍ଥିତମ୍ ।
ଵୈଦେହୀକୁଚକୁଂଭକୁଂକୁମରଜୋଲଂକାରହାରଂ ହରିଂ
ମାୟାମାନୁଷଵିଗ୍ରହଂ ରଘୁପତିଂ ସୀତାସମେତଂ ଭଜେ ॥ 145

ରାମଂ ରାକ୍ଷସମର୍ଦନଂ ରଘୁଵରଂ ଦୈତେୟଭିଧ୍ଵଂସିନଂ
ସୁଗ୍ରୀଵେପ୍ସିତରାଜ୍ୟଦଂ ସୁରପତେର୍ଭୀତ୍ୟଂତକଂ ଶାର୍‍ଂଗିଣମ୍ ।
ଭକ୍ତାନାମଭୟପ୍ରଦଂ ଭୟହରଂ ପାପୌଘଵିଧ୍ଵଂସିନଂ
ସାମୀରିସ୍ତୁତପାଦପଦ୍ମୟୁଗଳଂ ସୀତାସମେତଂ ଭଜେ ॥ 146

ୟତ୍ପାଦାଂବୁଜରେଣୁନା ମୁନିସତୀ ମୁକ୍ତିଂଗତା ୟନ୍ମହଃ
ପୁଣ୍ୟଂ ପାତକନାଶନଂ ତ୍ରିଜଗତାଂ ଭାତି ସ୍ମୃତଂ ପାଵନମ୍ ।
ସ୍ମୃତ୍ଵା ରାଘଵମପ୍ରମେୟମମଲଂ ପୂର୍ଣେଂଦୁମଂଦସ୍ମିତଂ
ତଂ ରାମଂ ସରସୀରୁହାକ୍ଷମମଲଂ ସୀତାସମେତଂ ଭଜେ ॥ 147

ଵୈଦେହୀକୁଚମଂଡଲାଗ୍ର-ଵିଲସନ୍ମାଣିକ୍ୟହସ୍ତାଂବୁଜଂ
ଚଂଚତ୍କଂକଣହାରନୂପୁର-ଲସତ୍କେୟୂରହାରାନ୍ଵିତମ୍ ।
ଦିଵ୍ୟଶ୍ରୀମଣିକୁଂଡଲୋଜ୍ଜ୍ଵଲ-ମହାଭୂଷାସହସ୍ରାନ୍ଵିତଂ
ଵୀରଶ୍ରୀରଘୁପୁଂଗଵଂ ଗୁଣନିଧିଂ ସୀତାସମେତଂ ଭଜେ ॥ 148

ଵୈଦେହୀକୁଚମଂଡଲୋପରି-ଲସନ୍ମାଣିକ୍ୟହାରାଵଳୀ-
ମଧ୍ୟସ୍ଥଂ ନଵନୀତକୋମଲରୁଚିଂ ନୀଲୋତ୍ପଲଶ୍ୟାମଲମ୍ ।
କଂଦର୍ପାୟୁତକୋଟିସୁଂଦରତନୁଂ ପୂର୍ଣେଂଦୁବିଂବାନନଂ
କୌସଲ୍ୟାକୁଲଭୂଷଣଂ ରଘୁପତିଂ ସୀତାସମେତଂ ଭଜେ ॥ 149

ଦିଵ୍ୟାରଣ୍ୟୟତୀଂଦ୍ରନାମନଗରେ ମଧ୍ୟେ ମହାମଂଟପେ
ସ୍ଵର୍ଣସ୍ତଂଭସହସ୍ରଷୋଡଶୟୁତେ ମଂଦାରମୂଲାଶ୍ରିତେ ।
ନାନାରତ୍ନଵିଚିତ୍ରନିର୍ମଲମହାସିଂହାସନେ ସଂସ୍ଥିତଂ
ସୀତାଲକ୍ଷ୍ମଣସେଵିତଂ ରଘୁପତିଂ ସୀତାସମେତଂ ଭଜେ ॥ 150

କସ୍ତୂରୀତିଲକଂ କପୀଂଦ୍ରହରଣଂ କାରୁଣ୍ୟଵାରାଂନିଧିଂ
କ୍ଷୀରାଂଭୋଧିସୁତାମୁଖାବ୍ଜମଧୁପଂ କଲ୍ୟାଣସଂପନ୍ନିଧିମ୍ ।
କୌସଲ୍ୟାନୟନୋତ୍ସୁକଂ କପିଵରତ୍ରାଣଂ ମହାପୌରୁଷଂ
କୌମାରପ୍ରିୟମର୍କକୋଟିସଦୃଶଂ ସୀତାସମେତଂ ଭଜେ ॥ 151

ଵିଦ୍ୟୁତ୍କୋଟିଦିଵାକରଦ୍ୟୁତିନିଭଂ ଶ୍ରୀକୌସ୍ତୁଭାଲଂକୃତଂ
ୟୋଗୀଂଦ୍ରୈସ୍ସନକାଦିଭିଃ ପରିଵୃତଂ କୈଲାସନାଥପ୍ରିୟମ୍ ।
ମୁକ୍ତାରତ୍ନକିରୀଟକୁଂଡଲଧରଂ ଗ୍ରୈଵେୟହାରାନ୍ଵିତଂ
ଵୈଦେହୀକୁଚସନ୍ନିଵାସମନିଶଂ ସୀତାସମେତଂ ଭଜେ ॥ 152

ମେଘଶ୍ୟାମଲମଂବୁଜାତନୟନଂ ଵିସ୍ତୀର୍ଣଵକ୍ଷସ୍ସ୍ଥଲଂ
ବାହୁଦ୍ଵଂଦ୍ଵଵିରାଜିତଂ ସୁଵଦନଂ ଶୋଣାଂଘ୍ରିପଂକେରୁହମ୍ ।
ନାନାରତ୍ନଵିଚିତ୍ରଭୂଷଣୟୁତଂ କୋଦଂଡବାଣାଂକିତଂ
ତ୍ରୈଲୋକ୍ୟାଽପ୍ରତିମାନସୁଂଦରତନୁଂ ସୀତାସମେତଂ ଭଜେ ॥ 153

ଵୈଦେହୀୟୁତଵାମଭାଗମତୁଲଂ ଵଂଦାରୁମଂଦାରକଂ
ଵଂଦେ ପ୍ରସ୍ତୁତକୀର୍ତିଵାସିତତରୁଚ୍ଛାୟାନୁକାରିପ୍ରଭମ୍ ।
ଵୈଦେହୀକୁଚକୁଂକୁମାଂକିତମହୋରସ୍କଂ ମହାଭୂଷଣଂ
ଵେଦାଂତୈରୁପଗୀୟମାନମସକୃତ୍ସୀତାସମେତଂ ଭଜେ ॥ 154

ଦେଵାନାଂ ହିତକାରଣେନ ଭୁଵନେ ଧୃତ୍ଵାଽଵତାରଂ ଧ୍ରୁଵଂ
ରାମଂ କୌଶିକୟଜ୍ଞଵିଘ୍ନଦଲନଂ ତତ୍ତାଟକାସଂହରମ୍ ।
ନିତ୍ୟଂ ଗୌତମପତ୍ନିଶାପଦଲନଶ୍ରୀପାଦରେଣୁଂ ଶୁଭଂ
ଶଂଭୋରୁତ୍କଟଚାପଖଂଡନମହାସତ୍ଵଂ ଭଜେ ରାଘଵମ୍ ॥ 155

ଶ୍ରୀରାମଂ ନଵରତ୍ନକୁଂଡଲଧରଂ ଶ୍ରୀରାମରକ୍ଷାମଣିଂ
ଶ୍ରୀରାମଂ ଚ ସହସ୍ରଭାନୁସଦୃଶଂ ଶ୍ରୀରାମଚଂଦ୍ରୋଦୟମ୍ ।
ଶ୍ରୀରାମଂ ଶ୍ରୁତକୀର୍ତିମାକରମହଂ ଶ୍ରୀରାମମୁକ୍ତିପ୍ରଦଂ
ଶ୍ରୀରାମଂ ରଘୁନଂଦନଂ ଭୟହରଂ ଶ୍ରୀରାମଚଂଦ୍ରଂ ଭଜେ ॥ 156

ରାମମିଂଦୀଵରଶ୍ୟାମଂ ରାଜୀଵାୟତଲୋଚନମ୍ ।
ଜ୍ୟାଘୋଷନିର୍ଜିତାରାତିଂ ଜାନକୀରମଣଂ ଭଜେ ॥ 157

ଦୀର୍ଘବାହୁମରଵିଂଦଲୋଚନଂ
ଦୀନଵତ୍ସଲମନାଥରକ୍ଷକମ୍ ।
ଦୀକ୍ଷିତଂ ସକଲଲୋକରକ୍ଷଣେ
ଦୈଵତଂ ଦଶରଥାତ୍ମଜଂ ଭଜେ ॥ 158

ପ୍ରାତସ୍ସ୍ମରାମି ରଘୁନାଥମୁଖାରଵିଂଦଂ
ମଂଦସ୍ମିତଂ ମଧୁରଭାଷି ଵିଶାଲଫାଲମ୍ ।
କର୍ଣାଵଲଂବିଚଲକୁଂଡଲଗଂଡଭାଗଂ
କର୍ଣାଂତଦୀର୍ଘନୟନଂ ନୟନାଭିରାମମ୍ ॥ 159

ପ୍ରାତର୍ଭଜାମି ରଘୁନାଥକରାରଵିଂଦଂ
ରକ୍ଷୋଗଣାୟ ଭୟଦଂ ଵରଦଂ ନିଜେଭ୍ୟଃ ।
ୟଦ୍ରାଜସଂସଦି ଵିଭିଦ୍ୟ ମହେଶଚାପଂ
ସୀତାକରଗ୍ରହଣମଂଗଳମାପ ସଦ୍ୟଃ ॥ 160

ପ୍ରାତର୍ନମାମି ରଘୁନାଥପଦାରଵିଂଦଂ
ପଦ୍ମାଂକୁଶାଦିଶୁଭରେଖଶୁଭାଵହଂ ଚ ।
ୟୋଗୀଂଦ୍ରମାନସମଧୁଵ୍ରତସେଵ୍ୟମାନଂ
ଶାପାପହଂ ସପଦି ଗୌତମଧର୍ମପତ୍ନ୍ୟାଃ ॥ 161

ପ୍ରାତର୍ଵଦାମି ଵଚସା ରଘୁନାଥନାମ
ଵାଗ୍ଦୋଷହାରି ସକଲଂ କଲୁଷଂ ନିହଂତୃ ।
ୟତ୍ପାର୍ଵତୀ ସ୍ଵପତିନା ସହ ଭୋକ୍ତୁକାମା
ପ୍ରୀତ୍ୟା ସହସ୍ରହରିନାମସମଂ ଜଜାପ ॥ 162

ପ୍ରାତଃ ଶ୍ରୟେ ଶ୍ରୁତିନୁତଂ ରଘୁନାଥମୂର୍ତିଂ
ନୀଲାଂବୁଦୋତ୍ପଲସିତେତରରତ୍ନନୀଲାମ୍ ।
ଆମୁକ୍ତମୌକ୍ତିକଵିଶେଷଵିଭୂଷଣାଢ୍ୟାଂ
ଧ୍ୟେୟାଂ ସମସ୍ତମୁନିଭିର୍ନିଜଭୃତ୍ୟମୁଖ୍ୟୈଃ ॥ 163

ରଘୁକୁଲଵରନାଥୋ ଜାନକୀପ୍ରାଣନାଥଃ
ପିତୃଵଚନଵିଧାତା କୀଶରାଜ୍ୟପ୍ରଦାତା ।
ପ୍ରତିନିଶିଚରନାଶଃ ପ୍ରାପ୍ତରାଜ୍ୟପ୍ରଵେଶୋ
ଵିହିତଭୁଵନରକ୍ଷଃ ପାତୁ ପଦ୍ମାୟତାକ୍ଷଃ ॥ 164

କୁଵଲୟଦଳନୀଲଃ ପୀତଵାସାଃ ସ୍ମିତାସ୍ୟୋ
ଵିଵିଧରୁଚିରଭୂଷାଭୂଷିତୋ ଦିଵ୍ୟମୂର୍ତିଃ ।
ଦଶରଥକୁଲନାଥୋ ଜାନକୀପ୍ରାଣନାଥୋ
ନିଵସତୁ ମମ ଚିତ୍ତେ ସର୍ଵଦା ରାମଚଂଦ୍ରଃ ॥ 165

ଜୟତୁ ଜୟତୁ ରାମୋ ଜାନକୀଵଲ୍ଲଭୋଽୟଂ
ଜୟତୁ ଜୟତୁ ରାମଶ୍ଚଂଦ୍ରଚୂଡାର୍ଚିତାଂଘ୍ରିଃ ।
ଜୟତୁ ଜୟତୁ ଵାଣୀନାଥନାଥଃ ପରାତ୍ମା
ଜୟତୁ ଜୟତୁ ରାମୋଽନାଥନାଥଃ କୃପାଳୁଃ ॥ 166

ଵଦତୁ ଵଦତୁ ଵାଣୀ ରାମରାମେତି ନିତ୍ୟଂ
ଜୟତୁ ଜୟତୁ ଚିତ୍ତଂ ରାମପାଦାରଵିଂଦମ୍ ।
ନମତୁ ନମତୁ ଦେହଂ ସଂତତଂ ରାମଚଂଦ୍ରଂ
ନ ଭଵତୁ ମମ ପାପଂ ଜନ୍ମଜନ୍ମାଂତରେଷୁ ॥ 167

ଆନଂଦରୂପଂ ଵରଦଂ ପ୍ରସନ୍ନଂ
ସିଂହେକ୍ଷଣଂ ସେଵକପାରିଜାତମ୍ ।
ନୀଲୋତ୍ପଲାଂଗଂ ଭୁଵନୈକମିତ୍ରଂ
ରାମଂ ଭଜେ ରାଘଵରାମଚଂଦ୍ରମ୍ ॥ 168

ଲଂକାଵିରାମଂ ରଣରଂଗଭୀମଂ
ରାଜୀଵନେତ୍ରଂ ରଘୁଵଂଶମିତ୍ରମ୍ ।
କାରୁଣ୍ୟମୂର୍ତିଂ କରୁଣାପ୍ରପୂର୍ତିଂ
ଶ୍ରୀରାମଚଂଦ୍ରଂ ଶରଣଂ ପ୍ରପଦ୍ୟେ ॥ 169

ସୁଗ୍ରୀଵମିତ୍ରଂ ପରମଂ ପଵିତ୍ରଂ
ସୀତାକଳତ୍ରଂ ନଵହେମସୂତ୍ରମ୍ ।
କାରୁଣ୍ୟପାତ୍ରଂ ଶତପତ୍ରନେତ୍ରଂ
ଶ୍ରୀରାମଚଂଦ୍ରଂ ଶିରସା ନମାମି ॥ 170

ଶ୍ରୀରାଘଵେତି ରମଣେତି ରଘୂଦ୍ଵହେତି
ରାମେତି ରାଵଣହରେତି ରମାଧଵେତି ।
ସାକେତନାଥସୁମୁଖେତି ଚ ସୁଵ୍ରତେତି
ଵାଣୀ ସଦା ଵଦତୁ ରାମ ହରେ ହରେତି ॥ 171

ଶ୍ରୀରାମନାମାମୃତମଂତ୍ରବୀଜଂ
ସଂଜୀଵନଂ ଚେନ୍ମନସି ପ୍ରତିଷ୍ଠମ୍ ।
ହାଲାହଲଂ ଵା ପ୍ରଳୟାନଲଂ ଵା
ମୃତ୍ୟୋର୍ମୁଖଂ ଵା ଵିତଥୀକରୋତି ॥ 172

କିଂ ୟୋଗଶାସ୍ତ୍ରୈଃ କିମଶେଷଵିଦ୍ୟା
କିଂ ୟାଗଗଂଗାଦିଵିଶେଷତୀର୍ଥୈଃ ।
କିଂ ବ୍ରହ୍ମଚର୍ୟାଶ୍ରମସଂଚରେଣ
ଭକ୍ତିର୍ନଚେତ୍ତେ ରଘୁଵଂଶକୀର୍ତ୍ୟାମ୍ ॥ 173

ଇଦଂ ଶରୀରଂ ଶ୍ଲଥସଂଧିଜର୍ଝରଂ
ପତତ୍ୟଵଶ୍ୟଂ ପରିଣାମପେଶଲମ୍ ।
କିମୌଷଥଂ ପୃଚ୍ଛସି ମୂଢ ଦୁର୍ମତେ
ନିରାମୟଂ ରାମକଥାମୃତଂ ପିବ ॥ 174

ହେ ରାମଭଦ୍ରାଶ୍ରୟ ହେ କୃପାଳୋ
ହେ ଭକ୍ତଲୋକୈକଶରଣ୍ୟମୂର୍ତେ ।
ପୁନୀହି ମାଂ ତ୍ଵଚ୍ଚରଣାରଵିଂଦଂ
ଜଗତ୍ପଵିତ୍ରଂ ଶରଣଂ ମମାଽସ୍ତୁ ॥ 175

ନୀଲାଭ୍ରଦେହ ନିଖିଲେଶ ଜଗନ୍ନିଵାସ
ରାଜୀଵନେତ୍ର ରମଣୀୟଗୁଣାଭିରାମ ।
ଶ୍ରୀଦାମ ଦୈତ୍ୟକୁଲମର୍ଦନ ରାମଚଂଦ୍ର
ତ୍ଵତ୍ପାଦପଦ୍ମମନିଶଂ କଲୟାମି ଚିତ୍ତେ ॥ 176

ଶ୍ରୀରାମଚଂଦ୍ର କରୁଣାକର ଦୀନବଂଧୋ
ସୀତାସମେତ ଭରତାଗ୍ରଜ ରାଘଵେଶ ।
ପାପାର୍ତିଭଂଜନ ଭୟାତୁରଦୀନବଂଧୋ
ପାପାଂବୁଧୌ ପତିତମୁଦ୍ଧର ମାମନାଥମ୍ ॥ 177

ଇଂଦୀଵରଦଳଶ୍ୟାମ-ମିଂଦୁକୋଟିନିଭାନନମ୍ ।
କଂଦର୍ପକୋଟିଲାଵଣ୍ୟଂ ଵଂଦେଽହଂ ରଘୁନଂଦନମ୍ ॥ 175

ଇତି ଶ୍ରୀବୋଧେଂଦ୍ରସରସ୍ଵତୀ କୃତ ଶ୍ରୀରାମକର୍ଣାମୃତମ୍ ॥