କନକଧାରା ସ୍ତୋତ୍ରମ୍ | Kanakdhara Strotram In Odia

Also Read This In:- Bengali, English, Gujarati, Hindi, Kannada, Malayalam, Marathi, Punjabi, Sanskrit, Tamil, Telugu.

ଵଂଦେ ଵଂଦାରୁ ମଂଦାରମିଂଦିରାନଂଦକଂଦଲମ୍ ।
ଅମଂଦାନଂଦସଂଦୋହ ବଂଧୁରଂ ସିଂଧୁରାନନମ୍ ॥

ଅଂଗଂ ହରେଃ ପୁଲକଭୂଷଣମାଶ୍ରୟଂତୀ
ଭୃଂଗାଂଗନେଵ ମୁକୁଳାଭରଣଂ ତମାଲମ୍ ।
ଅଂଗୀକୃତାଖିଲଵିଭୂତିରପାଂଗଲୀଲା
ମାଂଗଳ୍ୟଦାସ୍ତୁ ମମ ମଂଗଳଦେଵତାୟାଃ ॥ 1 ॥

ମୁଗ୍ଧା ମୁହୁର୍ଵିଦଧତୀ ଵଦନେ ମୁରାରେଃ
ପ୍ରେମତ୍ରପାପ୍ରଣିହିତାନି ଗତାଗତାନି ।
ମାଲାଦୃଶୋର୍ମଧୁକରୀଵ ମହୋତ୍ପଲେ ୟା
ସା ମେ ଶ୍ରିୟଂ ଦିଶତୁ ସାଗରସଂଭଵାୟାଃ ॥ 2 ॥

ଵିଶ୍ଵାମରେଂଦ୍ରପଦଵିଭ୍ରମଦାନଦକ୍ଷ-
-ମାନଂଦହେତୁରଧିକଂ ମୁରଵିଦ୍ଵିଷୋଽପି ।
ଈଷନ୍ନିଷୀଦତୁ ମୟି କ୍ଷଣମୀକ୍ଷଣାର୍ଥ-
-ମିଂଦୀଵରୋଦରସହୋଦରମିଂଦିରାୟାଃ ॥ 3 ॥

ଆମୀଲିତାକ୍ଷମଧିଗମ୍ୟ ମୁଦା ମୁକୁଂଦ-
-ମାନଂଦକଂଦମନିମେଷମନଂଗତଂତ୍ରମ୍ ।
ଆକେକରସ୍ଥିତକନୀନିକପକ୍ଷ୍ମନେତ୍ରଂ
ଭୂତ୍ୟୈ ଭଵେନ୍ମମ ଭୁଜଂଗଶୟାଂଗନାୟାଃ ॥ 4 ॥

ବାହ୍ଵଂତରେ ମଧୁଜିତଃ ଶ୍ରିତକୌସ୍ତୁଭେ ୟା
ହାରାଵଳୀଵ ହରିନୀଲମୟୀ ଵିଭାତି ।
କାମପ୍ରଦା ଭଗଵତୋଽପି କଟାକ୍ଷମାଲା
କଳ୍ୟାଣମାଵହତୁ ମେ କମଲାଲୟାୟାଃ ॥ 5 ॥

କାଲାଂବୁଦାଳିଲଲିତୋରସି କୈଟଭାରେ-
-ର୍ଧାରାଧରେ ସ୍ଫୁରତି ୟା ତଟିଦଂଗନେଵ ।
ମାତୁସ୍ସମସ୍ତଜଗତାଂ ମହନୀୟମୂର୍ତିଃ
ଭଦ୍ରାଣି ମେ ଦିଶତୁ ଭାର୍ଗଵନଂଦନାୟାଃ ॥ 6 ॥

ପ୍ରାପ୍ତଂ ପଦଂ ପ୍ରଥମତଃ ଖଲୁ ୟତ୍ପ୍ରଭାଵା-
-ନ୍ମାଂଗଳ୍ୟଭାଜି ମଧୁମାଥିନି ମନ୍ମଥେନ ।
ମୟ୍ୟାପତେତ୍ତଦିହ ମଂଥରମୀକ୍ଷଣାର୍ଧଂ
ମଂଦାଲସଂ ଚ ମକରାଲୟକନ୍ୟକାୟାଃ ॥ 7 ॥

ଦଦ୍ୟାଦ୍ଦୟାନୁପଵନୋ ଦ୍ରଵିଣାଂବୁଧାରା-
-ମସ୍ମିନ୍ନ କିଂଚନ ଵିହଂଗଶିଶୌ ଵିଷଣ୍ଣେ ।
ଦୁଷ୍କର୍ମଘର୍ମମପନୀୟ ଚିରାୟ ଦୂରଂ
ନାରାୟଣପ୍ରଣୟିନୀନୟନାଂବୁଵାହଃ ॥ 8 ॥

ଇଷ୍ଟାଵିଶିଷ୍ଟମତୟୋଽପି ୟୟା ଦୟାର୍ଦ୍ର-
-ଦୃଷ୍ଟ୍ୟା ତ୍ରିଵିଷ୍ଟପପଦଂ ସୁଲଭଂ ଲଭଂତେ ।
ଦୃଷ୍ଟିଃ ପ୍ରହୃଷ୍ଟକମଲୋଦର ଦୀପ୍ତିରିଷ୍ଟାଂ
ପୁଷ୍ଟିଂ କୃଷୀଷ୍ଟ ମମ ପୁଷ୍କରଵିଷ୍ଟରାୟାଃ ॥ 9 ॥

ଗୀର୍ଦେଵତେତି ଗରୁଡଧ୍ଵଜସୁଂଦରୀତି
ଶାକଂଭରୀତି ଶଶିଶେଖରଵଲ୍ଲଭେତି ।
ସୃଷ୍ଟିସ୍ଥିତିପ୍ରଳୟକେଳିଷୁ ସଂସ୍ଥିତାୟୈ
ତସ୍ୟୈ ନମସ୍ତ୍ରିଭୁଵନୈକଗୁରୋସ୍ତରୁଣ୍ୟୈ ॥ 10 ॥

ଶ୍ରୁତ୍ୟୈ ନମୋଽସ୍ତୁ ଶୁଭକର୍ମଫଲପ୍ରସୂତ୍ୟୈ
ରତ୍ୟୈ ନମୋଽସ୍ତୁ ରମଣୀୟଗୁଣାର୍ଣଵାୟୈ ।
ଶକ୍ତ୍ୟୈ ନମୋଽସ୍ତୁ ଶତପତ୍ରନିକେତନାୟୈ
ପୁଷ୍ଟ୍ୟୈ ନମୋଽସ୍ତୁ ପୁରୁଷୋତ୍ତମଵଲ୍ଲଭାୟୈ ॥ 11 ॥

ନମୋଽସ୍ତୁ ନାଳୀକନିଭାନନାୟୈ
ନମୋଽସ୍ତୁ ଦୁଗ୍ଧୋଦଧିଜନ୍ମଭୂମ୍ୟୈ ।
ନମୋଽସ୍ତୁ ସୋମାମୃତସୋଦରାୟୈ
ନମୋଽସ୍ତୁ ନାରାୟଣଵଲ୍ଲଭାୟୈ ॥ 12 ॥

ନମୋଽସ୍ତୁ ହେମାଂବୁଜପୀଠିକାୟୈ
ନମୋଽସ୍ତୁ ଭୂମଂଡଲନାୟିକାୟୈ ।
ନମୋଽସ୍ତୁ ଦେଵାଦିଦୟାପରାୟୈ
ନମୋଽସ୍ତୁ ଶାରଂଗାୟୁଧଵଲ୍ଲଭାୟୈ ॥ 13 ॥

ନମୋଽସ୍ତୁ ଦେଵ୍ୟୈ ଭୃଗୁନଂଦନାୟୈ
ନମୋଽସ୍ତୁ ଵିଷ୍ଣୋରୁରସିସ୍ଥିତାୟୈ ।
ନମୋଽସ୍ତୁ ଲକ୍ଷ୍ମ୍ୟୈ କମଲାଲୟାୟୈ
ନମୋଽସ୍ତୁ ଦାମୋଦରଵଲ୍ଲଭାୟୈ ॥ 14 ॥

ନମୋଽସ୍ତୁ କାଂତ୍ୟୈ କମଲେକ୍ଷଣାୟୈ
ନମୋଽସ୍ତୁ ଭୂତ୍ୟୈ ଭୁଵନପ୍ରସୂତ୍ୟୈ ।
ନମୋଽସ୍ତୁ ଦେଵାଦିଭିରର୍ଚିତାୟୈ
ନମୋଽସ୍ତୁ ନଂଦାତ୍ମଜଵଲ୍ଲଭାୟୈ ॥ 15 ॥

ସଂପତ୍କରାଣି ସକଲେଂଦ୍ରିୟନଂଦନାନି
ସାମ୍ରାଜ୍ୟଦାନଵିଭଵାନି ସରୋରୁହାକ୍ଷି ।
ତ୍ଵଦ୍ଵଂଦନାନି ଦୁରିତାହରଣୋଦ୍ୟତାନି
ମାମେଵ ମାତରନିଶଂ କଲୟଂତୁ ମାନ୍ୟେ ॥ 16 ॥

ୟତ୍କଟାକ୍ଷସମୁପାସନାଵିଧିଃ
ସେଵକସ୍ୟ ସକଲାର୍ଥସଂପଦଃ ।
ସଂତନୋତି ଵଚନାଂଗମାନସୈ-
-ସ୍ତ୍ଵାଂ ମୁରାରିହୃଦୟେଶ୍ଵରୀଂ ଭଜେ ॥ 17 ॥

ସରସିଜନିଲୟେ ସରୋଜହସ୍ତେ
ଧଵଳତମାଂଶୁକଗଂଧମାଲ୍ୟଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ
ତ୍ରିଭୁଵନଭୂତିକରି ପ୍ରସୀଦ ମହ୍ୟମ୍ ॥ 18 ॥

ଦିଗ୍ଘସ୍ତିଭିଃ କନକକୁଂଭମୁଖାଵସୃଷ୍ଟ-
-ସ୍ଵର୍ଵାହିନୀଵିମଲଚାରୁଜଲପ୍ଲୁତାଂଗୀମ୍ ।
ପ୍ରାତର୍ନମାମି ଜଗତାଂ ଜନନୀମଶେଷ-
-ଲୋକାଧିନାଥ ଗୃହିଣୀମମୃତାବ୍ଧିପୁତ୍ରୀମ୍ ॥ 19 ॥

କମଲେ କମଲାକ୍ଷଵଲ୍ଲଭେ ତ୍ଵଂ
କରୁଣାପୂର ତରଂଗିତୈରପାଂଗୈଃ ।
ଅଵଲୋକୟ ମାମକିଂଚନାନାଂ
ପ୍ରଥମଂ ପାତ୍ରମକୃତ୍ରିମଂ ଦୟାୟାଃ ॥ 20 ॥

ବିଲ୍ଵାଟଵୀମଧ୍ୟଲସତ୍ସରୋଜେ
ସହସ୍ରପତ୍ରେ ସୁଖସନ୍ନିଵିଷ୍ଟାମ୍ ।
ଅଷ୍ଟାପଦାଂଭୋରୁହପାଣିପଦ୍ମାଂ
ସୁଵର୍ଣଵର୍ଣାଂ ପ୍ରଣମାମି ଲକ୍ଷ୍ମୀମ୍ ॥ 21 ॥

କମଲାସନପାଣିନା ଲଲାଟେ
ଲିଖିତାମକ୍ଷରପଂକ୍ତିମସ୍ୟ ଜଂତୋଃ ।
ପରିମାର୍ଜୟ ମାତରଂଘ୍ରିଣା ତେ
ଧନିକଦ୍ଵାରନିଵାସ ଦୁଃଖଦୋଗ୍ଧ୍ରୀମ୍ ॥ 22 ॥

ଅଂଭୋରୁହଂ ଜନ୍ମଗୃହଂ ଭଵତ୍ୟାଃ
ଵକ୍ଷଃସ୍ଥଲଂ ଭର୍ତୃଗୃହଂ ମୁରାରେଃ ।
କାରୁଣ୍ୟତଃ କଲ୍ପୟ ପଦ୍ମଵାସେ
ଲୀଲାଗୃହଂ ମେ ହୃଦୟାରଵିଂଦମ୍ ॥ 23 ॥

ସ୍ତୁଵଂତି ୟେ ସ୍ତୁତିଭିରମୂଭିରନ୍ଵହଂ
ତ୍ରୟୀମୟୀଂ ତ୍ରିଭୁଵନମାତରଂ ରମାମ୍ ।
ଗୁଣାଧିକା ଗୁରୁତରଭାଗ୍ୟଭାଜିନୋ
ଭଵଂତି ତେ ଭୁଵି ବୁଧଭାଵିତାଶୟାଃ ॥ 24 ॥

ସୁଵର୍ଣଧାରାସ୍ତୋତ୍ରଂ ୟଚ୍ଛଂକରାଚାର୍ୟ ନିର୍ମିତମ୍ ।
ତ୍ରିସଂଧ୍ୟଂ ୟଃ ପଠେନ୍ନିତ୍ୟଂ ସ କୁବେରସମୋ ଭଵେତ୍ ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ କନକଧାରାସ୍ତୋତ୍ରଂ ସଂପୂର୍ଣମ୍ ।