ଦଶାଵତାର ସ୍ତୋତ୍ରମ୍ | Dashavatara Stotram In Odia

Also Read This In:- Bengali, English, Gujarati, Hindi, Kannada, Malayalam, Marathi, Punjabi, Sanskrit, Tamil, Telugu.

ଦେଵୋ ନଶ୍ଶୁଭମାତନୋତୁ ଦଶଧା ନିର୍ଵର୍ତୟନ୍ଭୂମିକାଂ
ରଂଗେ ଧାମନି ଲବ୍ଧନିର୍ଭରରସୈରଧ୍ୟକ୍ଷିତୋ ଭାଵୁକୈଃ ।
ୟଦ୍ଭାଵେଷୁ ପୃଥଗ୍ଵିଧେଷ୍ଵନୁଗୁଣାନ୍ଭାଵାନ୍ସ୍ଵୟଂ ବିଭ୍ରତୀ
ୟଦ୍ଧର୍ମୈରିହ ଧର୍ମିଣୀ ଵିହରତେ ନାନାକୃତିର୍ନାୟିକା ॥ 1 ॥

ନିର୍ମଗ୍ନଶ୍ରୁତିଜାଲମାର୍ଗଣଦଶାଦତ୍ତକ୍ଷଣୈର୍ଵୀକ୍ଷଣୈ-
ରଂତସ୍ତନ୍ଵଦିଵାରଵିଂଦଗହନାନ୍ୟୌଦନ୍ଵତୀନାମପାମ୍ ।
ନିଷ୍ପ୍ରତ୍ୟୂହତରଂଗରିଂଖଣମିଥଃ ପ୍ରତ୍ୟୂଢପାଥଶ୍ଛଟା-
ଡୋଲାରୋହସଦୋହଳଂ ଭଗଵତୋ ମାତ୍ସ୍ୟଂ ଵପୁଃ ପାତୁ ନଃ ॥ 2 ॥

ଅଵ୍ୟାସୁର୍ଭୁଵନତ୍ରୟୀମନିଭୃତଂ କଂଡୂୟନୈରଦ୍ରିଣା
ନିଦ୍ରାଣସ୍ୟ ପରସ୍ୟ କୂର୍ମଵପୁଷୋ ନିଶ୍ଵାସଵାତୋର୍ମୟଃ ।
ୟଦ୍ଵିକ୍ଷେପଣସଂସ୍କୃତୋଦଧିପୟଃ ପ୍ରେଂଖୋଳପର୍ୟଂକିକା-
ନିତ୍ୟାରୋହଣନିର୍ଵୃତୋ ଵିହରତେ ଦେଵସ୍ସହୈଵ ଶ୍ରିୟା ॥ 3 ॥

ଗୋପାୟେଦନିଶଂ ଜଗଂତି କୁହନାପୋତ୍ରୀ ପଵିତ୍ରୀକୃତ-
ବ୍ରହ୍ମାଂଡପ୍ରଳୟୋର୍ମିଘୋଷଗୁରୁଭିର୍ଘୋଣାରଵୈର୍ଘୁର୍ଘୁରୈଃ ।
ୟଦ୍ଦଂଷ୍ଟ୍ରାଂକୁରକୋଟିଗାଢଘଟନାନିଷ୍କଂପନିତ୍ୟସ୍ଥିତି-
ର୍ବ୍ରହ୍ମସ୍ତଂବମସୌଦସୌ ଭଗଵତୀମୁସ୍ତେଵଵିଶ୍ଵଂଭରା ॥ 4 ॥

ପ୍ରତ୍ୟାଦିଷ୍ଟପୁରାତନପ୍ରହରଣଗ୍ରାମଃକ୍ଷଣଂ ପାଣିଜୈ-
ରଵ୍ୟାତ୍ତ୍ରୀଣି ଜଗଂତ୍ୟକୁଂଠମହିମା ଵୈକୁଂଠକଂଠୀରଵଃ ।
ୟତ୍ପ୍ରାଦୁର୍ଭଵନାଦଵଂଧ୍ୟଜଠରାୟାଦୃଚ୍ଛିକାଦ୍ଵେଧସାଂ-
ୟା କାଚିତ୍ସହସା ମହାସୁରଗୃହସ୍ଥୂଣାପିତାମହ୍ୟଭୃତ୍ ॥ 5 ॥

ଵ୍ରୀଡାଵିଦ୍ଧଵଦାନ୍ୟଦାନଵୟଶୋନାସୀରଧାଟୀଭଟ-
ସ୍ତ୍ରୈୟକ୍ଷଂ ମକୁଟଂ ପୁନନ୍ନଵତୁ ନସ୍ତ୍ରୈଵିକ୍ରମୋ ଵିକ୍ରମଃ ।
ୟତ୍ପ୍ରସ୍ତାଵସମୁଚ୍ଛ୍ରିତଧ୍ଵଜପଟୀଵୃତ୍ତାଂତସିଦ୍ଧାଂତିଭି-
ସ୍ସ୍ରୋତୋଭିସ୍ସୁରସିଂଧୁରଷ୍ଟସୁଦିଶାସୌଧେଷୁ ଦୋଧୂୟତେ ॥ 6 ॥

କ୍ରୋଧାଗ୍ନିଂ ଜମଦଗ୍ନିପୀଡନଭଵଂ ସଂତର୍ପୟିଷ୍ୟନ୍ କ୍ରମା-
ଦକ୍ଷତ୍ରାମିହ ସଂତତକ୍ଷ ୟ ଇମାଂ ତ୍ରିସ୍ସପ୍ତକୃତ୍ଵଃ କ୍ଷିତିମ୍ ।
ଦତ୍ଵା କର୍ମଣି ଦକ୍ଷିଣାଂ କ୍ଵଚନ ତାମାସ୍କଂଦ୍ୟ ସିଂଧୁଂ ଵସ-
ନ୍ନବ୍ରହ୍ମଣ୍ୟମପାକରୋତୁ ଭଗଵାନାବ୍ରହ୍ମକୀଟଂ ମୁନିଃ ॥ 7 ॥

ପାରାଵାରପୟୋଵିଶୋଷଣକଲାପାରୀଣକାଲାନଲ-
ଜ୍ଵାଲାଜାଲଵିହାରହାରିଵିଶିଖଵ୍ୟାପାରଘୋରକ୍ରମଃ ।
ସର୍ଵାଵସ୍ଥସକୃତ୍ପ୍ରପନ୍ନଜନତାସଂରକ୍ଷଣୈକଵ୍ରତୀ
ଧର୍ମୋ ଵିଗ୍ରହଵାନଧର୍ମଵିରତିଂ ଧନ୍ଵୀ ସତନ୍ଵୀତୁ ନଃ ॥ 8 ॥

ଫକ୍କତ୍କୌରଵପଟ୍ଟଣପ୍ରଭୃତୟଃ ପ୍ରାସ୍ତପ୍ରଲଂବାଦୟ-
ସ୍ତାଲାଂକାସ୍ୟତଥାଵିଧା ଵିହୃତୟସ୍ତନ୍ଵଂତୁ ଭଦ୍ରାଣି ନଃ ।
କ୍ଷୀରଂ ଶର୍କରୟେଵ ୟାଭିରପୃଥଗ୍ଭୂତାଃ ପ୍ରଭୂତୈର୍ଗୁଣୈ-
ରାକୌମାରକମସ୍ଵଦଂତଜଗତେ କୃଷ୍ଣସ୍ୟ ତାଃ କେଳୟଃ ॥ 9 ॥

ନାଥାୟୈଵ ନମଃ ପଦଂ ଭଵତୁ ନଶ୍ଚିତ୍ରୈଶ୍ଚରିତ୍ରକ୍ରମୈ-
ର୍ଭୂୟୋଭିର୍ଭୁଵନାନ୍ୟମୂନିକୁହନାଗୋପାୟ ଗୋପାୟତେ ।
କାଳିଂଦୀରସିକାୟକାଳିୟଫଣିସ୍ଫାରସ୍ଫଟାଵାଟିକା-
ରଂଗୋତ୍ସଂଗଵିଶଂକଚଂକ୍ରମଧୁରାପର୍ୟାୟ ଚର୍ୟାୟତେ ॥ 10 ॥

ଭାଵିନ୍ୟା ଦଶୟାଭଵନ୍ନିହ ଭଵଧ୍ଵଂସାୟ ନଃ କଲ୍ପତାଂ
କଲ୍କୀ ଵିଷ୍ଣୁୟଶସ୍ସୁତଃ କଲିକଥାକାଲୁଷ୍ୟକୂଲଂକଷଃ ।
ନିଶ୍ଶେଷକ୍ଷତକଂଟକେ କ୍ଷିତିତଲେ ଧାରାଜଲୌଘୈର୍ଧ୍ରୁଵଂ
ଧର୍ମଂ କାର୍ତୟୁଗଂ ପ୍ରରୋହୟତି ୟନ୍ନିସ୍ତ୍ରିଂଶଧାରାଧରଃ ॥ 11 ॥

ଇଚ୍ଛାମୀନ ଵିହାରକଚ୍ଛପ ମହାପୋତ୍ରିନ୍ ୟଦୃଚ୍ଛାହରେ
ରକ୍ଷାଵାମନ ରୋଷରାମ କରୁଣାକାକୁତ୍ସ୍ଥ ହେଲାହଲିନ୍ ।
କ୍ରୀଡାଵଲ୍ଲଵ କଲ୍କିଵାହନ ଦଶାକଲ୍କିନ୍ନିତି ପ୍ରତ୍ୟହଂ
ଜଲ୍ପଂତଃ ପୁରୁଷାଃ ପୁନଂତୁ ଭୁଵନଂ ପୁଣ୍ୟୌଘପଣ୍ୟାପଣାଃ ॥

ଵିଦ୍ୟୋଦନ୍ଵତି ଵେଂକଟେଶ୍ଵରକଵୌ ଜାତଂ ଜଗନ୍ମଂଗଳଂ
ଦେଵେଶସ୍ୟଦଶାଵତାରଵିଷୟଂ ସ୍ତୋତ୍ରଂ ଵିଵକ୍ଷେତ ୟଃ ।
ଵକ୍ତ୍ରେ ତସ୍ୟ ସରସ୍ଵତୀ ବହୁମୁଖୀ ଭକ୍ତିଃ ପରା ମାନସେ
ଶୁଦ୍ଧିଃ କାପି ତନୌ ଦିଶାସୁ ଦଶସୁ ଖ୍ୟାତିଶ୍ଶୁଭା ଜୃଂଭତେ ॥

ଇତି କଵିତାର୍କିକସିଂହସ୍ୟ ସର୍ଵତଂତ୍ରସ୍ଵତଂତ୍ରସ୍ୟ ଶ୍ରୀମଦ୍ଵେଂକଟନାଥସ୍ୟ ଵେଦାଂତାଚାର୍ୟସ୍ୟ କୃତିଷୁ ଦଶାଵତାରସ୍ତୋତ୍ରମ୍ ।