ଭଜ ଗୋଵିଂଦମ୍ | Bhaja Govindam In Odia

Also Read This In:- Bengali, English, Gujarati, Hindi, Kannada, Malayalam, Marathi, Punjabi, Sanskrit, Tamil, Telugu.

ମୋହ ମୁଦ୍ଗରମ୍

ଭଜ ଗୋଵିଂଦଂ ଭଜ ଗୋଵିଂଦଂ
ଗୋଵିଂଦଂ ଭଜ ମୂଢମତେ ।
ସଂପ୍ରାପ୍ତେ ସନ୍ନିହିତେ କାଲେ
ନହି ନହି ରକ୍ଷତି ଡୁକୃଂକରଣେ ॥ 1 ॥

ମୂଢ ଜହୀହି ଧନାଗମତୃଷ୍ଣାଂ
କୁରୁ ସଦ୍ବୁଦ୍ଧିଂ ମନସି ଵିତୃଷ୍ଣାମ୍ ।
ୟଲ୍ଲଭସେ ନିଜକର୍ମୋପାତ୍ତଂ
ଵିତ୍ତଂ ତେନ ଵିନୋଦୟ ଚିତ୍ତମ୍ ॥ 2 ॥

ନାରୀସ୍ତନଭର-ନାଭୀଦେଶଂ
ଦୃଷ୍ଟ୍ଵା ମା ଗା ମୋହାଵେଶମ୍ ।
ଏତନ୍ମାଂସଵସାଦିଵିକାରଂ
ମନସି ଵିଚିଂତୟ ଵାରଂ ଵାରମ୍ ॥ 3 ॥

ନଲିନୀଦଲ-ଗତଜଲମତିତରଲଂ
ତଦ୍ଵଜ୍ଜୀଵିତମତିଶୟ-ଚପଲମ୍ ।
ଵିଦ୍ଧି ଵ୍ୟାଧ୍ୟଭିମାନଗ୍ରସ୍ତଂ
ଲୋକଂ ଶୋକହତଂ ଚ ସମସ୍ତମ୍ ॥ 4 ॥

ୟାଵଦ୍ଵିତ୍ତୋପାର୍ଜନସକ୍ତଃ
ତାଵନ୍ନିଜପରିଵାରୋ ରକ୍ତଃ ।
ପଶ୍ଚାଜ୍ଜୀଵତି ଜର୍ଜରଦେହେ
ଵାର୍ତାଂ କୋଽପି ନ ପୃଚ୍ଛତି ଗେହେ ॥ 5 ॥

ୟାଵତ୍ପଵନୋ ନିଵସତି ଦେହେ
ତାଵତ୍ପୃଚ୍ଛତି କୁଶଲଂ ଗେହେ ।
ଗତଵତି ଵାୟୌ ଦେହାପାୟେ
ଭାର୍ୟା ବିଭ୍ୟତି ତସ୍ମିନ୍କାୟେ ॥ 6 ॥

ବାଲସ୍ତାଵତ୍କ୍ରୀଡାସକ୍ତଃ
ତରୁଣସ୍ତାଵତ୍ତରୁଣୀସକ୍ତଃ ।
ଵୃଦ୍ଧସ୍ତାଵଚ୍ଚିଂତାସକ୍ତଃ
ପରମେ ବ୍ରହ୍ମଣି କୋଽପି ନ ସକ୍ତଃ ॥ 7 ॥

କା ତେ କାଂତା କସ୍ତେ ପୁତ୍ରଃ
ସଂସାରୋଽୟମତୀଵ ଵିଚିତ୍ରଃ ।
କସ୍ୟ ତ୍ଵଂ କଃ କୁତ ଆୟାତଃ
ତତ୍ତ୍ଵଂ ଚିଂତୟ ତଦିହ ଭ୍ରାତଃ ॥ 8 ॥

ସତ୍ସଂଗତ୍ଵେ ନିସ୍ସଂଗତ୍ଵଂ
ନିସ୍ସଂଗତ୍ଵେ ନିର୍ମୋହତ୍ଵମ୍ ।
ନିର୍ମୋହତ୍ଵେ ନିଶ୍ଚଲତତ୍ତ୍ଵଂ
ନିଶ୍ଚଲତତ୍ତ୍ଵେ ଜୀଵନ୍ମୁକ୍ତିଃ ॥ 9 ॥

ଵୟସି ଗତେ କଃ କାମଵିକାରଃ
ଶୁଷ୍କେ ନୀରେ କଃ କାସାରଃ ।
କ୍ଷୀଣେ ଵିତ୍ତେ କଃ ପରିଵାରଃ
ଜ୍ଞାତେ ତତ୍ତ୍ଵେ କଃ ସଂସାରଃ ॥ 10 ॥

ମା କୁରୁ ଧନ-ଜନ-ୟୌଵନ-ଗର୍ଵଂ
ହରତି ନିମେଷାତ୍କାଲଃ ସର୍ଵମ୍ ।
ମାୟାମୟମିଦମଖିଲଂ ହିତ୍ଵା
ବ୍ରହ୍ମପଦଂ ତ୍ଵଂ ପ୍ରଵିଶ ଵିଦିତ୍ଵା ॥ 11 ॥

ଦିନୟାମିନ୍ୟୌ ସାୟଂ ପ୍ରାତଃ
ଶିଶିରଵସଂତୌ ପୁନରାୟାତଃ ।
କାଲଃ କ୍ରୀଡତି ଗଚ୍ଛତ୍ୟାୟୁଃ
ତଦପି ନ ମୁଂଚତ୍ୟାଶାଵାୟୁଃ ॥ 12 ॥

କା ତେ କାଂତା ଧନଗତଚିଂତା
ଵାତୁଲ କିଂ ତଵ ନାସ୍ତି ନିୟଂତା ।
ତ୍ରିଜଗତି ସଜ୍ଜନସଂଗତିରେକା
ଭଵତି ଭଵାର୍ଣଵତରଣେ ନୌକା ॥ 13 ॥

ଦ୍ଵାଦଶ-ମଂଜରିକାଭିରଶେଷଃ
କଥିତୋ ଵୈୟାକରଣସ୍ୟୈଷଃ ।
ଉପଦେଶୋଽଭୂଦ୍ଵିଦ୍ୟା-ନିପୁଣୈଃ
ଶ୍ରୀମଚ୍ଛଂକର-ଭଗଵଚ୍ଛରଣୈଃ ॥ 14 ॥

ଜଟିଲୋ ମୁଂଡୀ ଲୁଂଛିତକେଶଃ
କାଷାୟାଂବର-ବହୁକୃତଵେଷଃ ।
ପଶ୍ୟନ୍ନପି ଚ ନ ପଶ୍ୟତି ମୂଢଃ
ଉଦରନିମିତ୍ତଂ ବହୁକୃତଵେଷଃ ॥ 15 ॥

ଅଂଗଂ ଗଲିତଂ ପଲିତଂ ମୁଂଡଂ
ଦଶନଵିହୀନଂ ଜାତଂ ତୁଂଡମ୍ ।
ଵୃଦ୍ଧୋ ୟାତି ଗୃହୀତ୍ଵା ଦଂଡଂ
ତଦପି ନ ମୁଂଚତ୍ୟାଶାପିଂଡମ୍ ॥ 16 ॥

ଅଗ୍ରେ ଵହ୍ନିଃ ପୃଷ୍ଠେ ଭାନୁଃ
ରାତ୍ରୌ ଚୁବୁକ-ସମର୍ପିତ-ଜାନୁଃ ।
କରତଲ-ଭିକ୍ଷସ୍ତରୁତଲଵାସଃ
ତଦପି ନ ମୁଂଚତ୍ୟାଶାପାଶଃ ॥ 17 ॥

କୁରୁତେ ଗଂଗାସାଗରଗମନଂ
ଵ୍ରତ-ପରିପାଲନମଥଵା ଦାନମ୍ ।
ଜ୍ଞାନଵିହୀନଃ ସର୍ଵମତେନ
ଭଜତି ନ ମୁକ୍ତିଂ ଜନ୍ମଶତେନ ॥ 18 ॥

ସୁରମଂଦିର-ତରୁ-ମୂଲ-ନିଵାସଃ
ଶୟ୍ୟା ଭୂତଲମଜିନଂ ଵାସଃ ।
ସର୍ଵ-ପରିଗ୍ରହ-ଭୋଗତ୍ୟାଗଃ
କସ୍ୟ ସୁଖଂ ନ କରୋତି ଵିରାଗଃ ॥ 19 ॥

ୟୋଗରତୋ ଵା ଭୋଗରତୋ ଵା
ସଂଗରତୋ ଵା ସଂଗଵିହୀନଃ ।
ୟସ୍ୟ ବ୍ରହ୍ମଣି ରମତେ ଚିତ୍ତଂ
ନଂଦତି ନଂଦତି ନଂଦତ୍ୟେଵ ॥ 20 ॥

ଭଗଵଦ୍ଗୀତା କିଂଚିଦଧୀତା
ଗଂଗାଜଲ-ଲଵକଣିକା ପୀତା ।
ସକୃଦପି ୟେନ ମୁରାରିସମର୍ଚା
କ୍ରିୟତେ ତସ୍ୟ ୟମେନ ନ ଚର୍ଚା ॥ 21 ॥

ପୁନରପି ଜନନଂ ପୁନରପି ମରଣଂ
ପୁନରପି ଜନନୀଜଠରେ ଶୟନମ୍ ।
ଇହ ସଂସାରେ ବହୁଦୁସ୍ତାରେ
କୃପୟାଽପାରେ ପାହି ମୁରାରେ ॥ 22 ॥

ରଥ୍ୟାଚର୍ପଟ-ଵିରଚିତ-କଂଥଃ
ପୁଣ୍ୟାପୁଣ୍ୟ-ଵିଵର୍ଜିତ-ପଂଥଃ ।
ୟୋଗୀ ୟୋଗନିୟୋଜିତ-ଚିତ୍ତଃ
ରମତେ ବାଲୋନ୍ମତ୍ତଵଦେଵ ॥ 23 ॥

କସ୍ତ୍ଵଂ କୋଽହଂ କୁତ ଆୟାତଃ
କା ମେ ଜନନୀ କୋ ମେ ତାତଃ ।
ଇତି ପରିଭାଵୟ ସର୍ଵମସାରଂ
ଵିଶ୍ଵଂ ତ୍ୟକ୍ତ୍ଵା ସ୍ଵପ୍ନଵିଚାରମ୍ ॥ 24 ॥

ତ୍ଵୟି ମୟି ଚାନ୍ୟତ୍ରୈକୋ ଵିଷ୍ଣୁଃ
ଵ୍ୟର୍ଥଂ କୁପ୍ୟସି ମୟ୍ୟସହିଷ୍ଣୁଃ ।
ଭଵ ସମଚିତ୍ତଃ ସର୍ଵତ୍ର ତ୍ଵଂ
ଵାଂଛସ୍ୟଚିରାଦ୍ୟଦି ଵିଷ୍ଣୁତ୍ଵମ୍ ॥ 25 ॥

ଶତ୍ରୌ ମିତ୍ରେ ପୁତ୍ରେ ବଂଧୌ
ମା କୁରୁ ୟତ୍ନଂ ଵିଗ୍ରହସଂଧୌ ।
ସର୍ଵସ୍ମିନ୍ନପି ପଶ୍ୟାତ୍ମାନଂ
ସର୍ଵତ୍ରୋତ୍ସୃଜ ଭେଦାଜ୍ଞାନମ୍ ॥ 26 ॥

କାମଂ କ୍ରୋଧଂ ଲୋଭଂ ମୋହଂ
ତ୍ୟକ୍ତ୍ଵାଽଽତ୍ମାନଂ ପଶ୍ୟତି ସୋଽହମ୍ ।
ଆତ୍ମଜ୍ଞାନଵିହୀନା ମୂଢାଃ
ତେ ପଚ୍ୟଂତେ ନରକନିଗୂଢାଃ ॥ 27 ॥

ଗେୟଂ ଗୀତା-ନାମସହସ୍ରଂ
ଧ୍ୟେୟଂ ଶ୍ରୀପତି-ରୂପମଜସ୍ରମ୍ ।
ନେୟଂ ସଜ୍ଜନ-ସଂଗେ ଚିତ୍ତଂ
ଦେୟଂ ଦୀନଜନାୟ ଚ ଵିତ୍ତମ୍ ॥ 28 ॥

ସୁଖତଃ କ୍ରିୟତେ କାମାଭୋଗଃ
ପଶ୍ଚାଦଂତ ଶରୀରେ ରୋଗଃ ।
ୟଦ୍ୟପି ଲୋକେ ମରଣଂ ଶରଣଂ
ତଦପି ନ ମୁଂଚତି ପାପାଚରଣମ୍ ॥ 29 ॥

ଅର୍ଥମନର୍ଥଂ ଭାଵୟ ନିତ୍ୟଂ
ନାସ୍ତିତତଃ ସୁଖଲେଶଃ ସତ୍ୟମ୍ ।
ପୁତ୍ରାଦପି ଧନଭାଜାଂ ଭୀତିଃ
ସର୍ଵତ୍ରୈଷା ଵିହିତା ରୀତିଃ ॥ 30 ॥

ପ୍ରାଣାୟାମଂ ପ୍ରତ୍ୟାହାରଂ
ନିତ୍ୟାନିତ୍ୟ ଵିଵେକଵିଚାରମ୍ ।
ଜାପ୍ୟସମେତସମାଧିଵିଧାନଂ
କୁର୍ଵଵଧାନଂ ମହଦଵଧାନମ୍ ॥ 31 ॥

ଗୁରୁଚରଣାଂବୁଜ-ନିର୍ଭରଭକ୍ତଃ
ସଂସାରାଦଚିରାଦ୍ଭଵ ମୁକ୍ତଃ ।
ସେଂଦ୍ରିୟମାନସ-ନିୟମାଦେଵଂ
ଦ୍ରକ୍ଷ୍ୟସି ନିଜହୃଦୟସ୍ଥଂ ଦେଵମ୍ ॥ 32 ॥

ମୂଢଃ କଶ୍ଚନ ଵୈୟାକରଣୋ
ଡୁଃକୃଂକରଣାଧ୍ୟୟନଧୁରୀଣଃ ।
ଶ୍ରୀମଚ୍ଛଂକର-ଭଗଵଚ୍ଛିଷ୍ୟୈଃ
ବୋଧିତ ଆସୀଚ୍ଛୋଧିତ-କରଣଃ ॥ 33 ॥

ଭଜ ଗୋଵିଂଦଂ ଭଜ ଗୋଵିଂଦଂ
ଗୋଵିଂଦଂ ଭଜ ମୂଢମତେ ।
ନାମସ୍ମରଣାଦନ୍ୟମୁପାୟଂ
ନହି ପଶ୍ୟାମୋ ଭଵତରଣେ ॥ 34 ॥